Hamdi Nuhiju
Zgjedhjet lokale po afrohen. Subjektet politike shqiptare dhe maqedonase si
duket janë duke kërkuar formula dhe forma se si të akomodohen pas zgjedhjeve të
vështira parlamentare ku të gjithë dolën fitues dhe humbës . Zgjedhjet lokale
si duket janë lënë në harresë ose po përmenden vetëm nëpër kafene nga eksponent
të ndryshëm të subjekteve politike si një kohë ose datë e mundshme e mbajtjes së
tyre. Por, deri më tani nuk kemi parë asnjë hap konkret të ndërmarr nga ana e
subjekteve politike shqiptare për përgatitjen e terrenit për zgjedhje.
Para mbajtjes së zgjedhjeve lokale po përfliten skenare të ndryshme të
ndryshimit të qeverisë ose opozitës. Zërat nën zë kanë filluar që sheshit të
shpalosin ide të ndryshme se si do të duhej që të ruhej ajo pjesë trupi
elektoral i pandikuar nga dyert e pushtetit disa dekadësh.
Zgjedhjet lokale që priten të mbahen në pranverën e vitit të ardhshëm
(2021), do të jenë proces më i vështirë sesa zgjedhjet e parakohshme
parlamentare. Nëse aleancat strategjike të subjekteve politike shqiptare dhe
maqedonase janë definuar qysh në zgjedhjet parlamentare, kjo gjë nuk nënkupton
se kjo formulë duhet që të vlejë edhe për zgjedhjet lokale. Edhe teza tjetër e
marrëveshjes së koalicionit për zgjedhje parlamentare bashkë me zgjedhjet
lokale është e arsyeshme dhe gjallë në tavolinën e subjekteve politike
shqiptare dhe maqedonase. Dallimin do ta bëjnë disa komuna speficike. Ato komuna
lidhen me individ specifik.
Nëse i besojmë logjikës shkak-pasojë, mos u habisni nëse përsëri Erkan
Arifi, kryetar i Komunës së Likovës dhe Arben Taravari, kryetar i Komunës së
Gostivarit t`i fitojnë zgjedhjet. Të mos flasim për kryetarin e Komunës së
Kumanovës, Maksim Dimitrievski i cili ka gjetur terren të përshtatshëm dhe të përpunuar
mirë nga ana e pasardhësve të tij.
Rezultatet e zgjedhjeve parlamentare për subjektet politike që përfaqësojnë
Taravarin dhe Erkan Arifin dëshmojnë për punën e mirë që ata kanë treguar në
terren. Por nuk është vetëm kjo komponent që këto dy kryetar komunash i bën
favorit edhe për këto zgjedhje lokale që priten të mbahen vitin e ardhshëm. Mjafton
të përcillësh punët në terren, aktivitetin e pandërprerë, komunikiminin me
opinionin si dhe mënyrën e qasjes në investime kapitale në këto dy komuna.
Për opinionin do të ishte e habitshme nëse kryetarja e Komunës së Tetovës,
Teuta Arifi dhe kryetari i Komunës së Studenicanit, Azem Sadiku do t`i fitonin
përsëri zgjedhjet.
Subjektet politike shqiptare duhet që të merren me matjen e rejtingut të
kandidatëve të tyre për kryetar komunash, si dhe rezultatet e treguara ose dështimet
eventuale të tyre gjatë viteve. Pushteti lokal është shumë më i rëndësishëm se
pushteti qëndror. Përmes këtij pushteti, qytetari preket direkt me punën ose
dembelizmin e udhëheqësit të institucioneve.
Të gjitha subjektet politike shqiptare kanë kuadro të cilat dinë dhe munden
të menaxhojnë me miliona problemet e komunave tona. Mjafton që ato kuadro të
mos lihen në listën e pritjes te dera e partisë, ndërsa të favorizohen ose të
avancohen individ të caktuar që kanë lidhje direkte me kryetarin e partisë.
Buxheti i komunave shqiptare nuk duhet që të përdoret si buxhet familjar i
kryetarit të komunës. Por të dihet saktësisht se kryetarët duhet të janë në shërbimin
e qytetarëve dhe jo e anasjellta.