Hamdi Nuhiju
Zgjedhjet e para parlamentare në epokën e pandemisë globale “Covid 19” kanë
nxjerr në pah mjerimin e përfaqësuesve politik shqiptar nëpër të gjitha Komunat
e Maqedonisë së Veriut. Mjerimi është më i thellë nëse gjurmojmë në Parlament
dhe në fjalimet e kandidatëve për deputet.
Pyetje për 1 milion dollar: Kur mbahen zgjedhjet, me 15 korrik, me 15
qershor, apo me 15 gusht? Lapsus dhe gabim që i ka ndodhur së paku njëherë të
gjithë kandidatëve të mundshëm për deputet nga të gjitha partitë politike
shqiptare, pa asnjë përjashtim.
Rrezet e diellit në këtë fund-qershor kanë kapur fort dhe si duket kujtesa
e kandidatëve për deputet ka nisur të turbullohet. Nuk janë mësuar me një
intensitet të këtillë garimi. Nuk janë mësuar të janë gju më gju me popullin. Nuk
janë mësuar të janë në shërbim të popullit. Nuk janë mësuar t`i dëgjojnë
brengat dhe hallet e popullit. Nuk janë mësuar të ecin fshatra e qytete
shqiptare brenda një orari normal 24 orësh. Populli pas zgjedhjeve, me të drejt
do të thotë: ah sikur kampanja zgjedhore të mos përfundonte.
Të gjithë e keni lexuar një meme që po qarkullon në Fejsbuk e që ka të bëje
me një komunë shqiptare në Maqedoninë e Veriut ku në një njoftim shkruhet se në
Komunë mund të shkohet vetëm për nevojën e madhe, nevojat e vogla do të kryhen
në formë elektronike? Jeni qeshur me zë? E tillë është gjendja edhe në këtë
kampanjë zgjedhore.
Partitë politike shqiptare hapin shtabet e tyre në cdo lagje, ndërsa pas
zgjedhjeve nuk ka asnjë zyre për deputetët e zonës. Edhe pse është obligim dhe
e drejt ligjore që të ekzistoje një zyre për deputetët e zonës ku qytetarët do
të kishin mundësi të takoheshin me përfaqësuesit e tyre për t`ia adresuar
brengat dhe hallet e tyre, këtë të drejt thuajse nuk po e përdor asnjë deputet
shqiptar. Ekziston një zotim nga ana e kandidatëve për deputet nga koalicioni “Tash
është koha” që këtë gjë pas zgjedhjeve do të fusin në funksion, por presim të
shohim.
Partitë politike shqiptare dhe përfaqësuesit e tyre politik, pas
zgjedhjeve, sic duket do të janë njëjtë si Komuna e famshme në periudhën e
pandemisë Covid 19: VETËM PËR NEVOJËN E
MADHE. Por kam frikën se nevoja do të jetë aq e madhe,saqë politikanët,
funksionarët e tyre do të humben në kohë dhe hapësirë.
Ndërsa në vendet demokratike me ekonomi dhe vizion, shteti i së drejtës nuk
i lejon komfort zonën deputetëve të zonës. Nuk ia lejon as komoditetin dhe mundësinë
që të luajnë me logjikën e popullit duke i menduar ata në dele, ndërsa veten në
ujk.
Sistemi i llogaridhënies që ekziston në Perëndim duhet zbatuar edhe nga
strukturat e reja politike në Maqedoninë e Veriut. Nuk mundet që të jesh
funksionar i një subjekti politik dhe të mos i japësh asnjë llogari votuesit tënd,
por edhe banorëve të zonës të cilët je duke i përfaqësuar.
Sa janë efikas ata funksionar, cili është dallimi prej pikës 1 kur kanë
marr funksionin e deri në pikën 2 kur u futën në garën zgjedhore dhe e lanë
funksionin? A keni dëgjuar deri më sot ndonjë funksionar shqiptar duke dhënë
llogari të këtillë? Unë personalisht nuk kam dëgjuar.
Me 15 korrik votuesi shqiptar duhet që të mendoje me kokën e tij dhe të
dije saktësisht se cfarë kërkon. Nuk është kërkesë legale vetëm vendi i punës,
por edhe mënyra e dinjitetshme e përfaqësimit. Nevojën e madhe e kryejmë tjetër
ku e jo në Komunë. Komunat t`i përdorim për të mirën e përgjithshme të qytetarëve.
No comments:
Post a Comment