Hamdi Nuhiju
Në librin “Frojdi dhe feja” të autorit turk Ali Kose, botim i Logos-a,
Shkup, mund të gjejmë një biografi interesante të themeluesit të psikanalizës.
Shkathtësitë e jashtëzakonshme të autorit për të nxjerr në pah anë më
interesante të jetës së Frojdit, si dhe mjeshtëria e përkthyesit, librin e bëjnë
shumë të qartë për të gjithë lexuesit. Sipas një grupi moralistësh, Frojdi është
sherri i cili erdhi në këtë botë për të qen kundër moralit dhe vlerave
njerëzore.
Për të kuptuar se a ishte sherr për njerëzimin a dobi, duhet
hulumtuar rrethanat jetësore të tij. Po subjekti i kësaj teme nuk është Frojdi
dhe biografia e tij. Thjeshtë ne po nxjerrim sentenca për të reflektuar mbi dy
realitete politike dhe fetare që po ndodhin në vendin tonë.
Frojdi lindi në një familje hebreje. Babai i tij, ishte liberal hebre,
d.m.th nuk ishte praktikues i rregullave të religjionit të tij. Në fëmijërinë e
Frojdit, po edhe gjatë tërë jetës së tij, rrol të veçantë do të ketë dadoja e
tij katolike e cila do të kujdeset shumë për të. Modeli i tij në fëmijëri ishte
dadoja e cila e mësonte për të gjitha gjërat. Shpesh herë shkonin bashkë në
kishë, dhe përgjigje për të gjitha pyetjet gjente tek ajo. Pas daljes prej
kishe, Frojdi shndërrohej në prift i përbetuar dhe orator që kuptonte dhe dinte
gati përmendsh mësimet që mësoheshin aty. Ai ishte në gjendje që të ndjek rrugë
misionare po të mos ndodhte një aksident psikologjik që do të ndryshoj rrjedhën
e jetës së tij fetare. Dadoja e cila ishte model për Frojdin, papritmas u
shndërrua në hajdute dhe iku nga jeta e tij.
Kjo gjë e tronditi shpirtërisht Frojdin dhe besimi i tij në Zot filloi që të
lëkundej. Pikë referimi për të gjitha analizat e tij e kishte dadon që e donte
aq shumë. Si fëmija i parë në një familje tetë fëmijësh, Frojdi kishte mundësi
të mëdha që të piqet në sferën e psikologjisë.
Ky reflektim merret me anën e jashtme e asesi atë të brendshmen,
rigoroze. Shqiptarët në përgjithësi si
dhe shqiptarët mysliman në veçanti e kanë gabuar shpesh herë modelin e tyre
jetësor.
Si model i shqiptarëve paraqitej Enver Hoxha dhe deri në vitet e nëntëdhjeta
njerëzit qanin për të, bile disa prej tyre edhe ishin futur në burg për shkak të
dashurisë që ndjenin ndaj tij. Njerëzit u zhgënjyen kur kuptuan se çfarë rruge
të errët janë duke ndjekur. Paramendoni
pesëdhjetë vite radhazi dikush mundohet që të ushqej popullin tonë me një
alternativë të pabazë. Përmes diktaturës së medieve dhe fuqisë së politikës, ky
popull po iu bindet dhe po merr hapa dhe shembuj të ndryshëm në shoqërinë tonë,
që nuk duhej marr.
Dadoja e Frojdit, një misionare katolike, nuk dallon shumë prej ‘ideologëve’
tanë kombëtar që ndër vite kanë gënjyer popullatën shqiptare për një jetesë më
të mirë. Nëse dikur ishte e ndaluar me ligj vizita nëpër kisha dhe xhami, sot
po ndalohet hyrja nëpër ato vende në mënyra tjera. Ndalimi dhe largimi prej një
gjëje ka dallim.
Periudha tjetër historike lidhej me mbretin Zog, i cili në sytë e disa
njerëzve është hero, ndërsa në sytë e shumicës së shqiptarëve ka qenë një
tradhtar i cili ka shitur toka të Shqipërisë, po edhe ka vrarë dhe prerë shumë
intelektual shqiptar. Shqiptarët e kishin idhull mbretin Zog, bile një kohë,
pati edhe një referendum në Shqipëri për kthimin e mbretërisë. Tek këto njerëz,
si model ishte mbreti Zog, dadoja e shqiptarëve të Ballkanit.
Historia e mëvonshme njeh ndryshime rrënjësore në skenën politike dhe
fetare, po vija ideologjike është e njëjtë. Si model u mor Ibrahim Rugova,
presidenti i Kosovës, njeriu i cili në çastet më kritike të kosovarëve, u takua
me diktatorin Sllobodan Millosheviq. Politika e tij katolik-centrike po ndiqet
edhe sot e kësaj dite nga elitat kosovare. Shqiptarët e Kosovës, po edhe ato
jashtë Kosovës, kishin si model të tyre Rugovën, madje disa edhe binin në
sexhde tek varri i tij.
Në Maqedoni u investua shumë që një figurë si Enver Hoxha, Ahmet Zogu,
Ibrahim Rugova apo Veton Surroi të mbillet. Pra si rezultat i përpjekjeve të
pandërprera të qarqeve të ndryshme ideologjike, shqiptarët e Maqedonisë morën
modelin e gabuar, presidentin historik të PDSH, Arben Xhaferi.
Periudhat e ndryshme historike të popullit shqiptarë si në Shqipëri, Kosovë
po edhe në Maqedoni njohin alternativa të rëndësishme. Secila periudhë
historike e ka pasur edhe atë anën e anatemuar nga ana e medieve dhe opinionit
publik, ndërsa në skenë kanë mbijetuar vetëm disa figura të caktuara që kanë
qenë të përshtatshme për forcat e ndryshme jashtë Ballkanit.
Në ditarin e tij të botuar në formë libri me titull “ Gjurmë” autori i saj
Akif Emre ndërmjet tjerash , në datën 6 shkurt 1999 shkruan:” Sot fillon
konferenca e cila do t`i tubojë shqiptarët e Kosovës dhe administratën serbe.
Shqiptarët kanë problem me përfaqësimin. Shtetet e mëdha perëndimore më shumë
interesim tregojnë pas Ibrahim Rugovës sesa ndaj përfaqësuesve të Ushtrisë Çlirimtare
të Kosovës. Më kujtohen fjalët e Ibrahim Rugovës që i pati shkruar në një
artikull:’ Nëna dhe babai im i besonin Allahut, por unë veten time nuk e
llogaris për mysliman’”.( Gjurmë, Akif Emre, Shkup, 2011, f.30).
Ndërsa në një intervistë të bërë nga Enver Robelli me presidentin historik
të PDSH, Arben Xhaferi, në çështjen e perceptimit të Zotit nga ky i fundit,
Arben Xhaferi jep një përgjigje të gjerë ku ne po shkoqisim vetëm një pjesë:”
Së pari, meqë njeriu ka kapacitete të kufizuara njohëse, ai nuk mund të vendosë
relacion komunikimi me Zotin, pos nëse Ai vet i paraqitet në trajtën e njeriut,
pra të Jezu Krishtit, i cili flet me gjuhë të kuptueshme. Të gjitha krijesat
janë të kufizuara nga dimensionet e paracaktuara. Bie fjala është i pamundshëm
komunikimi i njeriut me insekte, ose me gjallesa të tjera që veprojnë në mënyrë
instiktive, pra që s’kanë vetëdije.”
Tash është pak e pakuptimtë se si shqiptarët e Kosovës i bien në sexhde varrit të Ibrahim Rugovës, ose bëjnë ndonjë
dua tek varri i tij, kur ai vet ka deklaruar se nuk ka qenë mysliman? Pastaj si
është e mundur që Arben Xhaferi të shikohet në prizmin religjioz si një njeri që
e ka dashur religjionin e tij kur ai mundohet që Zotin ta perceptoje përmes
Jezu Krishtit, ose krishterimit?
Ne nuk kemi asgjë kundër personaliteteve të ndryshme shqiptare që i
përkasin religjionit jo islam. Unë më shumë do të isha i gëzuar sikur
kryeministër i Shqipërisë të ishte Pandeli Majko edhe pse nuk i përket
religjionit islam sesa Sali Berisha. Si shqiptar i Maqedonisë do të përfitoja më
shumë nga pozita e Pandeli Majkos sesa nga harresa totale e Sali Berishës që i
bënë shqiptarëve të këtushëm.
Mendoj se njëqindvjetori i pavarësisë së Shqipërisë duhet ndryshuar kahen e
marrjes së modelit për shqiptarët. Sepse modelet si dadoja e Frojdit më shumë
nga largojnë nga ideja kombëtare sesa na afrojnë. Ne kemi nevoja për figura
poliedrike që bashkojnë popullin shqiptarë, duke mos cenuar ndjenjat religjioze
po edhe laike të asnjërit.
Edhe vërejtja e dytë që mund ta paraqesim në këtë reflektim është edhe
fjala e thënë pa ia bashkangjitur edhe veprën. Të tillë fatkeqësisht po janë
shumë udhëheqës tanë fetarë, të cilët tentojnë që të ndryshojnë gjendjen e
popullit për të mirë, po pa e ndryshuar fillimisht ato vetveten.
Fatkeqësisht pas njëqind viteve shtet shqiptar sot të flasësh për fenë
është fundamentalizëm, irredentizëm, ta duash të mirën e popullit është
servilizëm dhe të punosh në sferën e politikës sipas një grupi njerëzve është
‘haram’( e ndaluar).
No comments:
Post a Comment