Hamdi Nuhiju
Organizatat joqeveritare nga
Maqedonia, Shqipëria dhe Kosova, organizuan një protestë paqësore në Shkup,
Tiranë dhe Prishtinë në shenjë solidarizimi me viktimat e demokratizimit të
shoqërisë egjiptiane. Me këtë rast, namazi i xhenazes në mungesë iu fal dëshmorëve,
të cilët po i japin leksione historike të gjitha shteteve të botës.
Egjipti është njëri prej shteteve
më të rëndësishme afrikane, pse jo edhe botërore. Si shtet i plotëson të gjitha
parakushtet për të qenë një shtet botëror. Po u drejtua Egjipti u drejtua e tërë
bota. Po qëndroi në kaos Egjipti, e tërë bota do t`i pësojë efektet e atij
kaosi.
Motoja ‘ Të gjithë jemi RABIA’
depërtoi në secilin cep të botës. Kjo moto depërtoi edhe në secilën shtëpi të
shqiptarëve mysliman. Vetëm laramanët e kombit tonë i qëndrojnë përballë kësaj
motoje dhe qorrazi solidarizohen me puçin ushtarak në Egjipt.
Protestat e përgjakshme në
Egjipt, për kthimin e presidentit legjitim të shtetit hafëz Muhamed Mursi,
demaskuan fytyrat e shumë njerëzve, shteteve, grupeve të interesit.
Protestuesit paqësor në rrugë
duke kërkuar demokratizimin e vendit, tanket dhe snajperët e shtetit duke vrarë
protestuesit, financuesit e shtypësve të protestuesve dhe bota demokratike
qorre, janë disa pasqyrime reale që na bëjnë të mendojmë se demokracia nuk është
rruga me standarde të njëjta për krejt popujt e botës. Prandaj, edhe disa popuj
e urrejnë dhe e luftojnë deri në palcë.
Nëse demokracia është e mirë për
një evropian, ajo po ashtu duhet të jetë e mirë dhe e pranueshme edhe për një
egjiptian ose palestinez. Po u shkelën standardet demokratike në Evropë, ashtu
si u shkelën në Egjipt dhe Palestinë, bota demokratike nuk do të qëndronte e
shurdhër.
Solidarizimi i popullit shqiptar,
me protestuesit në Egjipt si dhe me presidentin Mursi, ndërlidhet edhe me
njohjen e pavarësisë së Kosovës nga ana e presidentit legjitim Muhamed Mursi.
Muhamed Mursi është i pari
president arab i cili ia ktheu shpinën Serbisë në dobi të Kosovës dhe shqiptarëve
që jetojnë në të.
Dyert e universitetit më të vjetër
në botë Az`har, gjithmonë kanë qenë të hapura për të edukuar dhe arsimuar
kuadro të reja të popullit shqiptar nga Maqedonia, Kosova e Shqipëria.
Gjatë konflikteve të armatosura në
Kosovë, Maqedoni e Luginë të Preshevës, ndihmat e organizatave të ndryshme jo
qeveritare nga Egjipti dhe vende tjera arabe, kanë qenë faktor gati vendimtar për
kthimin e shqiptarëve në epiqendër të qëndresës.
Rruga paqësore e protestuesve egjiptian
dhe dhuna e terrori i ushtrisë egjiptiane, i frikëson edhe banorët e Maqedonisë,
po qe se dëshiruan që të ndërmarrin hapin për rrëzimin e ‘ Mubarekut’ të këtij vendi.
Qëndresa e palëkundur e
protestuesve deri në rënie dëshmor, ia hap sytë banorit të Maqedonisë për rrugën
drejt ndryshimeve demokratike në vend. Pranvera arabe nisi nga Egjipti, duhet shndërruar
në pranverë ballkanike në Maqedoni.
No comments:
Post a Comment