Hamdi Nuhiju
Qeveria e Maqedonisë, përmes
Drejtorisë së të Hyrave Publike, ka nisur një aksion marramendës në mbylljen e
bizneseve të ndryshme në tërë Republikën. Kjo gjë ka ardhur si rezultat i
zbrazjes së buxhetit të Maqedonisë në destinacione të paditura e përmes kësaj forme
tentohet që të arrihet deri tek rebalancimi i të njëjtit.
Arsyetimi i mbylljes së bizneseve
është banal. Dyqind ose njëmijë denar të zihen tepër në portofol dhe për to t`i
dënohesh 3000 ose edhe më shumë euro. Logjika e palogjikshme shkon drejt asaj
se këto dyqind ose treqind denar po dëmtojnë buxhetin e Republikës së Maqedonisë,
pasi që për to nuk po paguhet tatim.
Do të pajtohesha me hapat e këtilla
të kësaj qeverie, po qe se e njëjta për të njëjtat biznese do të përkujdesej për
infrastrukturën biznesore, për të drejtat e pronarëve nga konkurrenca ose edhe
për të drejtën e konsumatorëve nga monopoli duke siguruar drejtësi dhe mirëqenie
për të gjithë. Por, përderisa veprohet në mënyrë të njëanshme duke dëmtuar të
gjitha palët që nuk janë në pushtet ose të afërt me pushtetin, mbushja e këtillë
e buxhetit, përveç që tregon dobësi dhe injorancë politike, po ashtu shpreh arrogancën
e garniturës shtetërore që po dëshiron ta ndryshoj edhe sistemin politik. Në këtë
mënyrë, nga sistemi demokratik i deklaruar në letër dhe media, po tentohet që të
dilet në sistemin diktatorial ku gjithmonë i pushtetshmi ka të drejtë dhe është
i pagabueshëm.
Ky pushtet u njëanshëm u pa edhe
gjatë bllokadës ekonomike e tregtare me Republikën e Kosovës, ku edhe pse dihej
se firma Mak Trans, po shkel ligjet e Maqedonisë, kjo gjë e deklaruar nga zëdhënësi
i policisë, e njëjta nuk u dënua. Përmes hapit të saj u dëmtua ekonomia e
Maqedonisë dhe në këtë mënyrë shteti po bëhet nënë për Mak Trans, ndërsa njerkë
për të gjitha bizneset shqiptare e maqedonase që nuk po janë të afërta me
pushtetin.
Ajo që më habit nga veprimtaria e
fundit e DHP, është edhe mbyllja e disa dyqaneve dhe dënimi i tyre me para aq të
mëdha sa ato brenda mall nuk kanë. Ekonomia e Maqedonisë duhet që të jetë e lirë
në veprimtarinë e saj. Pa ekonomi ne nuk mund të kemi edhe shtet. Si mund të sigurojmë
mirëqenie, ne, qytetarët e këtij vendi, kur kjo ekonomi ngulfatet nga aksione të
këtilla?
Nëse synimi i këtij aksioni të
fundit të DHP është që të krijoj frikë te bizneset shqiptare e maqedonase të opozitës,
ia ka arritur qëllimit, madje edhe një shkallë më lartë. Ajo ka krijuar frikë
edhe tek popullata që jeton në këtë shtet. Respektimi i ligjeve të shtetit bëhet
nga të gjitha anët. Sanksionimi për thyerjen e tyre është pjesa e fundit e rrëfimit.
Kur nuk ka asnjë zgjidhje tjetër të arsyeshme për thyerjen e ligjit, atëherë
vjen deri tek sanksionimi. Po para saj, njëherë duhet që të përdoren të gjitha
mekanizmat politik, ekonomik dhe menaxhues për të mos e sjell situatën deri tek
sanksionimi.
Në shtetet e fuqishme
demokratike, ku ekziston ekonomia e lirë e tregut, për ta bindur një biznes për
të paguar taksa dhe tatime, ajo i siguron kushte të barabarta për punë dhe
fitim. Më pastaj, nuk ka nevojë që të intervenoj fare për vjeljen e taksave që
i takojnë, pasi që kur kushtet janë të siguruara dhe bizneset shkojnë në rritje
stabile, normal që edhe buxheti i atij shteti e merr pjesën që i takon.
Pas aksionit të fundit të DHP,
nuk e besoj se ndonjë investitor serioz do të jetë i interesuar për të
investuar në Maqedoni, dhe ata pak mërgimtar tanë që kanë pasur logjikë
biznesi, do të i shuhet dëshira dhe vullneti për të gjallëruar sfera të
ndryshme të ekonomisë përmes kapitalit të tyre të freskët.
Po vazhdoi në këtë mënyrë DHP, përveç
mbylljes së bizneseve, medieve, do të filloj që të mbyll edhe Republikën e
Maqedonisë. Atje ku nuk mbin as bimë e as barë, nuk ka as jetë e as shtet.
No comments:
Post a Comment