Hamdi Nuhiju
Na ka treguar Sufjan b. Vekiu, i
cili thotë: Na ka treguar Hafs b. Gajathi, ky prej Haxhaxhit, ky prej Mekhulit,
ky prej Ebu Shimalit, ky prej Ebu Ejubit, i cili thote: I Dërguari i Allahut
s.a.v.s. ka thënë:
“Katër veti janë prej suneteve, të
dërguarve: turpi, parfumoja, përdorimi i misvakut dhe kurorëzimi”.
( Suneni i Tirmidhiut, vëllimi 4, Shkup, 2008,
f.16-17)
I Dërguari s.a.v.s. përveç se
ishte mëshirë për botët, ai ishte edhe mësuesi i njerëzimit. Përmes tij reflektojnë
shpirtrat dhe zemrat e besimtarëve mysliman deri në Ditën e Llogarisë. Shembull
i përkryer i cili duhet ndjekur hap pas hapi, është ky eliksir. A nuk janë momente
dhe veçori edhe të ditëve të sotme këto veti që po përmenden në këtë hadith të
Resulullahut alejhi selam? Apo ndoshta ai ka filozofuar dhe biseduar për një
kohë dhe një popull të caktuar, krejtësisht të panjohur për ne?
Mungesa e marrjes shembull prej të
Dërguarit alejhi selam, ose edhe ngatërrimi i shembullit me njerëz dhe
personalitete tjera, krijon çrregullime në fytyrat e zemrat e besimtarëve mysliman.
Shpirtrat e tyre njollosen, ndërsa zemrat egërsohen. Mirëkuptimi minimizohet
deri në zhdukje, ndërsa keqkuptimi zgjerohet deri në qiell.
Gjuha e xhelozisë, blasfemisë dhe
urrejtjes ka kapur besimtarin mysliman si top futbolli duke e hedhur prej njërit
skaj të fushës, e në skajin tjetër. Ai në vend se të ketë vlerë reale dhe mbizotëruese
mbi krijesat tjera, krijesat tjera, ndoshta me intuitën e tyre mund të habiten
për të.
Katër elementet kyçe që sot po mungojnë
tek besimtarët mysliman janë:
1. Turpi: A nuk do të ishte madhështore sikur të turpëroheshim pak
më shumë sesa po pretendojmë se po turpërohemi? Sikur të turpëroheshim si prind
karshi fëmijëve tanë dhe fenomeneve të ndryshme shoqërore, edhe fëmijët tanë do
të turpëroheshin prej të njëjtave gjëra. Sikur të turpëroheshim prej Allahut për
të mos bërë mëkate ditën e natën, me siguri se do të ishim njerëz të ndryshëm. Po
qe se u turpëruan vajzat tona që me zhveshjen e tyre bëjnë të provokohen djem të ndryshëm, ne me siguri do të
kishim djem besimtar dhe të devotshëm, po edhe vlera e vajzave tona do të ishte
shumë më e madhe sesa pretendojmë në letër. Morali do të ishte cilësia primare
që do të mbizotëronte skenën, ndërsa amorali do të ishte një gjë e panjohur për
ne. Drejtësia dhe rregulli shoqëror e familjar do të mbisundonin, përçarja e zënkat
nuk do të kishin vend.
2. Parfumosja: Allahu është i bukur dhe e do të bukurën. Allahu e
ka krijuar të bukur njeriun. Për atë bukuri, njeriu merret në përgjegjësi për
kujdesin dhe mos kujdesin e tij. Ah sikur të kujdeseshim që në çdo namaz ne të parfumoheshim,
ose të lyheshim me erëra të këndshme, e jo në namaz të kundërmojmë erë të
padurueshme. Parfumoja afron besimtarët ndërmjet veti, shton sinqeritetin dhe
dashurinë midis tyre. Nuk është i njëjtë, një besimtar i cili nuk kujdeset për
pamjen e tij të jashtme, me një besimtar i cili kujdeset. Pamja e jashtme e
njeriut reflekton pamjen e brendshme. Nëse ai në pamjen e jashtme duket i
çrregulluar nga pakujdesi, e jo nga modestia e pretenduar, nuk ka dyshim se
edhe në pamjen e tij të brendshme është i çrregulluar. Ai me gjuhën e tij
tenton të gënjej njerëzit se pamja e tij e brendshme është e rregulluar, por
pamja e jashtme e demanton atë mënyrë të folurit.
3. Përdorimi i misvakut: Sa prej besimtarëve mysliman mbajnë higjienë
orale? Numri i tyre fatkeqësisht është shumë i vogël. Përderisa larja e dhëmbëve është sunnet i të dërguarve,
jo vetëm i të Dërguarit Muhammed alejhi selam, nuk e di se si pretendojmë ne se
po ndjekim rrugën e Pejgamberit Muhammed alejhi selam. Të nisim prej gjërave më
esenciale, para se t`ia mësojmë besimtarit mysliman rritjen e mjekrës dhe
shkurtimin e mustaqeve, le ta këshillojmë e mësojmë me përdorimin e misvakut,
ose mjeteve të ndryshme për larjen e dhëmbëve. Duke e larguar llomin e dhëmbëve
nga mesi i besimtarëve mysliman, kemi bardhësuar një sunnet të Pejgamberit
Muhammed alejhi selam.
4. Kurorëzimi: Sa të shumtë janë besimtarët e besimtaret mysliman e
myslimane që po e shtyjnë martesën për arsye të paarsyeshme? A nuk do të shuhej
vala e imoralitetit dhe a nuk do të minimizoheshin problemet që dalin si
rrjedhojë e epsheve të pakontrolluara, duke përdorur kurorëzimin? Mos u frikësoni
nga kurorëzimi. Allahu xh.sh. e do besimtarin e besimtaren myslimane që janë të
përgatitur për të marr përgjegjësi në këtë jetë. Dhe nuk ka asnjë dyshim, se
Ai, pra Allahu, ato asnjëherë nuk i le në vetvete. Gjithmonë i gjendet pranë me
ndihmën e Tij të pafundme.
No comments:
Post a Comment