Hamdi Nuhiju
Vetkënaqësia e disa anëtarëve dhe simpatizantëve të
subjekteve politike shqiptare në Republikën e Maqedonisë i ka sjell deri në atë
nivel saqë të shkruajnë në rrjetet sociale: “Filan partinë as vdekja nuk e mund”.
Edhe pse situata politike është e tillë që mund të dëgjojmë
fjalë dhe premtime të ndryshme nga subjekte të caktuara politike, përsëri
njeriu duhet që të jetë i matur, pasi që pas një kohe do të mund që të turpërohet
nga e kaluara e tij. Njeriu që jeton me parime asnjëherë nuk turpërohet nga
veprimet e tij, por kur tek njerëzit mbisundojnë gjithmonë emocionet para vetëdijes,
ndërgjegjes, mendjes, në të ardhmen do t`i paraqiten si një fotografi e zymtë.
Ekzistenca e shumë subjekteve politike shqiptare në
Maqedoni e ka shtuar edhe bisedën dhe akuzat dhe sulmet e ndërsjella. Në këtë
periudhë njeriu mund të merret me shumëçka. E sidomos gazetarët që e kanë
profesion të merren pikërisht me këto elemente.
Ajo që habit njerëzit është orientimi ose vija se si është
vizatuar për të ardhmen e shqiptarëve të Maqedonisë. Disa parti politike
shqiptare ‘ nuk i mund as vdekja’ sipas simpatizantëve të tyre, të tjerat ‘ nuk
kanë para t`i blejnë mediet’, të tjerat e shohin liderin e tyre si ‘të dërguar
të Zotit’ , tjerat mallkojnë dhe shajnë si gratë gjithmonë kur bishti i zihet
me derë.
Ajo që brengos njerëzit është çorientimi total në
aspektin ideologjik dhe nacional. Sheh hoxhallar ose ish hoxhallar të renditur
pas një subjekti politik komunist që ka mbyllur dhe vrarë shumë hoxhallar, sheh
shqiptar që renditen pas një subjekti politik maqedonas, sheh musliman që për
interesa të një subjekti politik janë në gjendje të çojnë në ferr ose xhehenem
secilin musliman që është aktiv në politik. Definitivisht te shqiptarët e
Maqedonisë duhet ndërhyrë urgjentisht në themel për të ndryshuar gjërat kah e
mira. Përndryshe shumë lehtë do të bëhemi pre e pangopshmërisë sllave e cila
nuk di të ngihet nga shqiptarët.
Shqiptarët e Maqedonisë në të kaluarën kanë pasur vizion
dhe arsye për të ndryshuar pozitën e tyre. PPD-ja si forcë politike në periudhën
e saj pat vendosur kontaktet e para të shqiptarëve me pushtetin, duke ia bërë
me dije të tjerëve se ky shtet pa shqiptarët nuk bëhet. Misioni i saj në atë
kohë është realizuar me sukses. Gabimet e asaj lëvizje politike kanë krijuar një
subjekt të ri politik, PDSH-në e cila në kohën e Arbër Xhaferit kishte vizionin
e demokratizimit të shqiptarëve të Maqedonisë si dhe avancimin e tyre në të
gjitha sferat e shoqërisë. Edhe kjo fazë e PDSH-së ka kaluar me të mira dhe të
këqija të saja deri në momentin e kryengritjes popullore dhe krijimit të
subjektit të ri politik, BDI-së e cila ndryshoi me lehtësi shumë gjëra që në të
kaluarën mundej vetëm të diskutoheshin nëpër kuvende të ndryshme dhe oda midis
burrash dhe urtarësh shqiptar. Kjo parti mjaft kohë ka harxhuar në kultivimin
dhe zhvillimin e avancimit të shqiptarëve të Maqedonisë dhe me të mirat dhe të
metat e saja do të vije një moment kur do t`ia lëshoje radhën ose rendin edhe
subjekteve tjera politike shqiptare. Ajo që e brengos shqiptarin e Maqedonisë është
krijimi i shumë fraksioneve politike shqiptare të cilat as që kanë një
strategji se si t`i mbulojnë të metat e subjektit në pushtet dhe t`i nxjerrin
shqiptarët në një fazë tjetër të avancimit dhe zhvillimit të tyre në Maqedoni.
Mendoj se partitë me njerëz që thuan për partinë e tyre
se ‘as vdekja nuk mund ta munde’ do ta kishin shumë të vështirë kapjen për dore
të shqiptarëve të Maqedonisë dhe nxjerrjen e tyre në një fazë tjetër.
Për në fund të gjithë do të vdesim. I Pavdekshëm është
vetëm ZOTI.
No comments:
Post a Comment