Hamdi Nuhiju
Raportet politike në Republikën e Maqedonisë janë shndërruar
në turbulenca të tilla që njeriu nuk mund t`ia gjej fillin. Ku është fillimi
dhe ku fundi. Nëse të pyet dikush prej jashtë Maqedonisë një pyetje të thjeshtë:
cili opsion politik është më i miri dhe më i përshtatshmi?
Do të duhej rrëfyer menjëherë
enigmën e parrëfyeshme dhe zbuluar të shekullit: Çka i tha Dema Kadrisë?! Ende sot
e kësaj dite nuk e kemi kuptuar se çka i ka thënë Dema Kadrisë.
Edhe pse disa mund të trumbetojnë se së paku e dinë
vendin se ku është takuar Dema me Kadrinë, megjithatë përsëri enigma ngelet e
hapur. Kjo për arsye të kontestimit se Kadria me Demën a u takua me Sushiko,
ose në ndonjë vend tjetër të panjohur për opinionin e brendshëm dhe atë
rajonal.
Politika shqiptare në Maqedoni në periudhën parazgjedhore
si duket është futur në një qorrsokak. Shqiptarëve iu janë errësuar sytë dhe po
i duket larg drita e cila duhet t`i nxjerr nga errësira. Kujt t`i besojmë, me
cilin të renditemi, kujt t`i vrapojmë pas? Këto pyetje tashmë kanë nisur që të
shoshiten në odën e shoshitjes, kësaj shoshitje qëllimisht po i frynë partitë e
organizuara me qëllim të krijimit të turbulencave më të mëdha dhe mos krijimit
të një imazhi të qartësuar.
Flitet për moralin politik, për vetveten, për egon dhe
thirret gjithmonë në egon dhe vetveten, ndërsa popullata shqiptare nuk ka nevojë
për egon dhe vetveten e politikanëve, por për zhvillimin ekonomik, ndryshimin e
gjendjes sociale, nacionale dhe infrastrukturore në vend.
Në mungesë të vizioneve të qarta të nxjerrjes së popullit
prej errësirës në dritë, politikanët tanë po e mbushin kohën me demagogji,
folklorizma dhe sintagma të pazbërthyeshme dhe të pakuptueshme edhe për vet
politikanët.
Si rezultat i kësaj, shqiptari i Maqedonisë me 11 dhjetor
të këtij viti do të ketë një mision të vështirë se a do të ketë mundësi që përfundimisht
ta zgjidh enigmën shekullore: Çka i tha Dema Kadrisë?
Këto fraksione politike në fazën e krijimit të listave të
kandidatëve për deputet dhanë shumë autogola për vetveten dhe shoqërinë. Nuk i dhanë
shumë mundësi zgjedhjeje elektoratit shqiptar dhe bënë matematika të tilla që tregojnë
qartas edhe ndasitë e tyre të brendshme ndërfraksionale.
Partitë politike shqiptare në vend se të merren me
objektiva dhe zhvillimin e një platforme ekonomike, politike, sociale,
nacionale, ata në disa vende ende nuk kanë njerëz për të caktuar në listat e
tyre zgjedhore. Të tjerat merren me listat, me njëra-tjetrën, me sulme të ndërsjella,
me folklorizëm të pabazë, duke u shndërruar në enigmë që zhduket pas 11
dhjetori të këtij viti.
Me 12 dhjetor të këtij viti, shqiptarët e Maqedonisë rrugën
e tyre të mbijetesës nacionale, ekonomike, politike e sociale do ta kanë ende më
të turbullt se tani. Kjo gjë po vërehet prej tani prej rrugëtimit të partive
dhe fraksioneve politike shqiptare.
Fatkeqësisht thëniet e Demës për Kadrinë tek shqiptarët e
Maqedonisë do të ngelin enigmë edhe për një kohë të gjatë.
No comments:
Post a Comment