Hamdi Nuhiju
Protestat e studentëve e kanë nxjerr nga shpella kryeministrin e Shqipërisë,
Edi Rama për të komunikuar me opinionin dhe studentët për gjetjen e një
zgjidhje të përhershme për problemet e tyre.
Është e habitshme kjo ftesë
reflektimi e kryeministrit kur dihet tashmë se ai në momentet e para të njëjtit
i quante ngelësa, ose siç dikur UCK-të tona, disa shqiptarë, sllavë dhe perëndimor
i quanin ushtri terroriste.
Protestave të studentëve i paraprinë protestat e banorëve në Unazën e Re në
Tiranë si dhe problemi i një demokracie jo funksionale me mungesën e opozitës në
Parlament. Tashmë u bë një kohë prej kur opozita shqiptare ka bojkotuar Parlamentin,
ndërsa Edi Rama si duket po ndjen kënaqësi maksimale duke shfrytëzuar haptas këtë
mundësi të artë për të çuar para agjendat e tij partiake ndoshta edhe
klienteliste.
Kërkesat e studentëve janë kundër tarifave të shtrenjta, por në thelb përmbajnë
atë frikën e eksperimentimit që thuajse të gjitha qeveritë në Shqipëri,
Maqedoni, Kosovë, Serbi e më gjërë po bëjnë me arsimin. Studentët frikësohen se
fati i tyre do të vendoset në dorën e eksperimentuesve që do të zhvlerësonte në
tërësi mundin e tyre, por edhe pasurinë e prindërve të tyre. Në Maqedoni për
shembull edhe sot e kësaj dite eksperimentohet me arsimin fillor, të mesëm dhe
të lartë ku thuajse çdo vit ka ndryshime të cilat vetëm se po e ulin cilësinë
dhe po shtojnë korrupsionin dhe kuadrot jo profesionale të gatshme për t`u shpërngulur
jashtë shtetit.
Problemi i diplomave të blera, i skandaleve seksuale, titujve shkencor të
fituar përmes rrugës së plagjiaturës vetëm se janë shtuar pas të gjitha atyre
reformave të bëra nga qeveria e Republikës së Maqedonisë.
Nëse hulumtojmë në thelb problemet e studentëve shqiptar në Shqipëri, gjejmë
të njëjtat simptoma me nuanca ndryshimesh dhe me një tendencë në rritje të përfshirjes
së politikës në shkaktimin e problemeve dhe shtimin e vuajtjes së studentëve. Ajo
që dallon prej studentëve shqiptar në Maqedoni, është vetëdija e lartë e
organizimit të studentëve në Shqipëri duke ngritur zërin e tyre kundër të gjitha
padrejtësive që po bën qeveria e Edi Ramës. Tashmë u bënë disa ditë që studentët
kanë dal në rrugë duke detyruar politikën që të tërhiqet dhe të futet në proces
dialogimi.
Është interesante të nxirret në pah mënyra e sjelljes së kryeministrit Edi
Rama dhe ministrave të tij me protestuesit student, me ato në Unazën e Re, me opozitën,
me mënyrën e sjelljes së ish kryeministrit të qeverisë së Republikës së
Maqedonisë Veriore, Nikolla Gruevski i cili tashmë ka fituar statusin e
azilantit në Hungari.
Edi Rama me azilantin Nikolla Gruevski çuditërisht nuk dallojnë aspak. Mjafton
të reflektojmë duke kapur disa momente të ngjashme për të kuptuar se sa janë të
ngjashëm këto dy personalitete politike:
1. Në kohën e Nikolla Gruevskit, në Maqedoni lulëzonin kompanitë off shorë,
ku nga bombat e kryeministrit të tanishëm Zoran Zaev u kuptua për shumë afera
korruptive për ndërtimin e autostradave, rrugëve magjistrale , si dhe projektit
skandaloz ‘Shkupi 2014’.
- Në shumë debate televizive si dhe në mediet online dhe të shkruara në
Shqipëri është aktuale tema e 2 km rrugëve në Unazën e Re që do të kushtojnë 40
milion euro, ku njëra prej firmave fituese të tenderit është një kompani
off-shorë me dokumente të falsifikuara ( shih emisionin : Të Paekspozuarit).
2. Banorët e Maqedonisë, Nikolla Gruevskin e mbajnë mend me stilin e tij
populist ku dilte rrugëve të Maqedonisë dhe nga rruga në telefon porosiste vartësit
e tij për t`i kryer obligimet e tyre ditore. E gjithë kjo gjë bëhej me një qëllim
për tu treguar njerëzve se gjoja i njëjti është i angazhuar vazhdimisht në
zgjidhjen e halleve të njerëzve dhe gjithmonë është pranë tyre.
- Sot jemi dëshmitar të propagandës së Edi Ramës i cili po i keqpërdor rastet
sociale në Shqipëri përmes ERTV duke luajtur rrolin e një humanisti të madh, e
duke u munduar që t`i zgjidh hallet e tyre. Edi Rama po ikë nga rroli i
kryeministrit dhe ka marr rrolin e një shoqate humanitare që kujdeset për të
zgjidhur hallet e banorëve të vet.
3. Lufta që Nikolla Gruevski i bëri medieve nuk ishte dëgjuar më parë. Në kohën
e tij u mbyllë A1 njëri prej televizioneve më të fuqishme në vend, u blenë
gazeta, portale dhe televizione, u censurua opinioni publik përmes arrestimit të
gazetarëve, si dhe në rrethana të panjohura edhe ndërroi jetë gazetari Nikolla
Mladenov. Si rezultat i tërë kësaj, në Maqedoni kishim media të kapura, censura
ishte në nivel si dhe mungonte dukshëm liria e shprehjes.
- Edi Rama e kaloi për një hap Nikolla Gruevskin, duke e hapur direkt një
televizion të tij ERTV. Ai i ka shpallur luftë direkte medieve, madje në kohën
e tij u mbyll Agon Channel, u blenë disa medie si dhe përmes paketës anti-shpifje
ai i ka shpallur luftë direkte fjalës së lirë dhe medieve.
4. Në kohën e Nikolla Gruevskit, i njëjti dukej se është tejet i interesuar
për problemet dhe protestat e studentëve, duke futur njerëz të vet në protestë,
duke blerë organizatorët, madje edhe duke organizuar anti-protesta që do të
kishin në rend dite temën e njëjtë-problemet studentore.
- Sot Edi Rama po fton studentët të reflektojnë duke i ftuar në debat
publik, ku nga raportimet në medie duket sikur ka infiltruar njerëz të vet, ka
blerë organizatorët si rasti me Arlind Qorrin, dhe duket sikur është tejet i
interesuar për të zgjidhur hallet e studentëve. Ajo që mungon nga Edi Rama është
anti-protesta që do të kishte në rend dite temën e njëjtë me studentët:
problemet e studentëve.
5. Nikolla Gruevski i shpalli luftë të hapur opozitës, ku dihet mirëfilli se
dhunshëm i përjashtoi prej dyerve të Parlamentit në të premten e zezë ku
miratoi buxhetin e famshëm kontrovers që i mundësonte t`i realizoje në praktikë
të gjitha aferat e tij korruptive.
- Sot Edi Rama sillet me përçmim ndaj opozitës, aktorët e saj kryesor i
quan pleq dixhital, ndërsa kreun e opozitës e përqesh haptas në medie duke u
munduar që ta nxjerr jashtë kontekstit kohor të gjithë aktivitetin e tij
politik.
Shkurtimisht këto janë vetëm disa pika të ngjashme midis Edi Ramës dhe
Nikolla Gruevskit. Ajo që mbajnë mend shqiptarët e Maqedonisë është fati famëkeq
i Nikolla Gruevskit i cili nga një person i fuqishëm në Maqedoni u shndërrua në
një azilant në Hungari. Dhe këtë fat ia përcaktuan pikërisht studentët dhe
Plenumet e tyre studentore të cilët nuk u frikësuan aspak nga e gjithë forca në
rënie e Nikolla Gruevskit. Ata me guximin dhe këmbënguljen e tyre i dhanë zor
Nikolla Gruevskit nga kolltuku i kryeministrit në kantën e plehrave.
Sjellja e sotme e kryeministrit Edi Rama më ngjason shumë me përfundimin e karrierës
politike të Nikolla Gruevskit. Me studentët përballë, banorët e revoltuar që do
t`i prishen shtëpitë për t`u realizuar afera të pastra korruptive, me keqpërdorimin
e klasave sociale për të përmirësuar imazhin karshi shqiptarëve, me luftën që
po i shpall medieve, Edi Rama nuk e ka larg përfundimin.
No comments:
Post a Comment