Hamdi Nuhiju
Zgjedhjet e parakohshme parlamentare të caktuara që të mbahen për me 12
prill të vitit 2020 tashmë janë vulosur. Janë krijuar të gjitha kushtet dhe
rrethanat politike dhe strategjike që ato të mbahen. Për kryeministër teknik në
qeverinë që do të merret me organizimin e zgjedhjeve është caktuar ministri
aktual i punëve të brendshme Oliver Spasovski. Ndërsa, propozimi i parë i
VMRO-DPMNE-së për ministër teknik në qeverinë e organizimit të zgjedhjeve është
refuzuar nga lideri i LSDM-së, Zoran Zaev, si një propozim antikushtetues.
Tashmë kur fotografia e zgjedhjeve të 12 prillit është e qartë edhe për
subjektet politike shqiptare, kanë nisur që të organizohen edhe pozicionimet si
dhe sulmet fillestare.
Beteja e shqiptarëve të LSDM-së, në krye me nënkryetarin e këtij subjekti,
Muhamed Zekiri është në raport me BDI-në. Në diskursin e tyre publik ata
vazhdimisht merren me BDI-në, duke synuar elektoratin e kësaj partie. Në anën tjetër,
lideri i LSDM-së, Zoran Zaev, në harmoni të plotë me nënkryetarin e tij, po
tenton që të balancoj ujin e turbulluar në opinion në raportet LSDM-BDI, ku njëri
funksionar mbyll derën, ndërsa tjetri le një derë hapur.
BDI-ja ka deklaruar se në këto zgjedhje do të dal e vetme pa pasur nevojë për
koalicion me ndonjë subjekt tjetër, ndërsa sipas informacioneve të mia prej
burimeve brenda qeverisë, BDI e ka lutur në vazhdimësi PDSH-në dhe partinë
Alternativa për të krijuar një koalicion parazgjedhor.
Në rrethana të këtilla, kur BDI-ja po del e vetme në zgjedhje pasi që nuk
ka pasur mundësi të gjej partner për koalicionim, PDSH-ja ka vendosur që më mirë
të shkoj me LSDM-në në koalicion sesa me BDI-në. Në sytë e skeptikëve
nacionalist, veprimi i PDSH-së duket i pakuptimtë, por realisht kjo parti si
partner më serioz edhe në raport me shqiptarët e ka parë LSDM-së sesa BDI-në e
Ali Ahmetit.
Tashmë edhe pozicionimi i PDSH-së është bërë publik në raport me zgjedhjet
e parakohshme parlamentare.
Aleanca për Shqiptarët muajt e fundit ka përgatitur terrenin dhe opinionin
me një krijim të një koalicioni parazgjedhor. Për ASH-në e Zijadin Selës opsion
B është dalja e vetme në zgjedhje. Aleanca për Shqiptarët janë në bisedime të
vazhdueshme me partinë Alternativa të Afrim Gashit si dhe me Lëvizjen Besa të
Bilall Kasamit. Sipas Zijadin Selës, nëse këto tre parti arrijnë një koalicion
para zgjedhor, do të kishin mundësi që t`i fitonin 15 deputet dhe përfundimisht
BDI-në ta dërgonin në opozitë. Ndërsa, nëse do të arrinin një koalicion vetëm me
partinë Alternativa të Afrim Gashit, ky koalicion do t`i kishte 13 deputet, ndërsa
BDI-ja do të ishte në opozitë. Sipas të gjitha sondazheve dhe parametrave,
Aleanca për Shqiptarët si me Lëvizjen Besa si pa Lëvizjen Besa, BDI-në do ta dërgonte
përfundimisht në opozitë.
Por nëse do të dilte e vetme në zgjedhje, edhe pse sondazhet po e nxjerrin
mirë, ajo do ta kishte vështirë që të përballej me garniturat shtetërore dhe
pengesave të hatashme që BDI-ja ka ndërtuar qe gati 20 vite.
Tema e zgjedhjeve të parakohshme parlamentare në Maqedoninë e Veriut është pikërisht
ky koalicion midis ASH-së dhe partisë Alternativa. Nëse me të vërtet koalicioni
ndodh, atëherë dihet edhe pozicionimi i radhëve në mesin e subjekteve politike
shqiptare.
Sot në mediet shqiptare në Maqedoninë e Veriut ka qarkulluar një shkrim pa autorësi,
i cili e nxirrte PDSH-në dhe partinë Alternativa si partner të mundshëm
parazgjedhor me LSDM-në. Esenca e këtij shkrimi nuk ishte qëndrimi i PDSH-së,
pasi që tashmë dihet haptas se PDSH-ja ka vendosur që më mirë të shkoj me
LSDM-në sesa me BDI-në, por këtu u sulmua qëndrimi i partisë Alternativa. Dihet
se kyci i fitores te shqiptarët në zgjedhjet e parakohshme parlamentare që do të
mbahen me 12 prill të këtij viti qëndron te partia Alternativa.
Kujt i konvenon që koalicioni ASH-Alternativa të mos ndodh?
Janë tre subjekte politike që nuk i konvenon ky koalicion: BDI-së,
VMRO-DPMNE-së dhe Lëvizjes Besa.
BDI-së nuk i konvenon ky lloj koalicioni, pasi që në këtë variant ajo
shkuarjen në opozitë do ta kishte të sigurt.
VMRO-DPMNE-së nuk i konvenon ky koalicion, pasi që do të kishin pengesa
serioze për ta prishur Marrëveshjen e Prespës, nëse eventualisht do t`i fitonin
zgjedhjet te maqedonasit.
Lëvizjes Besa asnjëherë nuk i ka konvenuar ekzistenca e Partisë
Alternativa. Sikur t`i konvenonte ata nuk do të ndaheshin, por do të ishin një
subjekt i vetëm. Pa marr parasysh qëndrimeve që i shprehin në opinion në lidhje
me koalicionin e mundshëm ASH-Alternativa-Lëvizja Besa, ata thellë në vetvete
kanë qëndrime armiqësore ndaj Partisë Alternativa.
No comments:
Post a Comment