Hamdi Nuhiju
Maqedonia ose siç kanë qejf ta quajnë nacionalistët ekstrem shqiptar FYROM,
edhe njëherë nuk mori përgjigje pozitive ose ftese për t`u anëtarësuar në
instancat ndërkombëtare. Pragu i artë edhe pse duhet të jetë prag i skëterrës që
mund të bien të gjitha subjektet politike, po edhe qeveritë, përsëri kësaj here
kaloi në heshtje totale ose në shfajësim dhe ngjyrim të skajshëm me nacionalizëm.
Ndoshta qeveria aktuale u mundua që këtë prag të skëterrës ta shndërroj në
shllag pak para zgjedhjeve lokale, ose edhe pse jo, para zgjedhjeve të
parakohshme parlamentare që nuk është çudi se mund të ndodhin në Maqedoni.
Për t`u shndërruar në bombë atomike, e jo në shlag që do të keqpërdoret nga
politikanët, pozita e jashtme e Maqedonisë, duhet që vetëdija politike e
shqiptarëve dhe maqedonasve të këtij territori të ndryshojë. Pikëpamja e djathtë
dhe e majtë jo që duhet zhdukur në aksionin politik, por duhet marr parasysh
vlera e njeriut në këtë copë toke si qytetar i këtij shteti, e jo thjesht si
shqiptar, si maqedonas, si rom, si turk, ose vlera religjioze si mysliman,
ortodoks, bektashi e katolik. Pikëpamja qytetare i bashkon të gjitha
identitetet tjera të cilat përbëjnë një kolorit pasurish dhe një standard për të
vepruar me vizion.
Megjithë tentimin për të ndryshuar qasjen e mentalitetit politik në
Maqedoni, vet politikanët e huaj po i fryjnë këtij mentaliteti dhe si duket në
mënyrë të orkestruar po nxjerrin afishet e tyre për të hedhur në erë të gjithë
pozicionet e ngrira të partive politike në vend. Njeriu edhe pa syze mund të
kuptoj ikjen e Gruevskit, ashtu aksidentalisht në SHBA, me rastin e festës së
njëqindvjetorit të shtetit shqiptar në Shkup. Po ashtu, nuk duhen syze për të
kuptuar rrahjet e shqiptarëve në mes të Shkupit, pleq e të rinj, plaka e fëmijë,
nga ana e huliganëve maqedonas. Kjo kartë, sa për të turbulluar situatën hodhi
hapin tek etniteti turk në Maqedoni, kur para do kohësh u rrahën dy student
turq në Shkup.
Në vend që të shuhej zjarri ndëretnik në vend, Shtefan Fule në rrjetin
social, vendimin për Maqedoninë e shkruan si vendim për Shkupin, duke e ditur
haptas se po bën lojën e ndonjë partie politike në vend. Në vend të provokimit,
duhej përdorur diplomacia e zgjidhjes së problemeve midis dy etniteteve më të mëdha
në Republikën e Maqedonisë.
Përndryshe, folklori politik maqedonas, tash ka një armik të ri dhe të
hapur, R. e Bullgarisë. Mediat maqedonase
folën gjerë e gjatë për rrolin e ri të Bullgarisë në Ballkan të cilin
rrol e mori me bekimin e presidentit të ri zgjedhur të SHBA-ve, Barak Obama. Si
duket kësaj here, Greqia nuk i ka bërë shumë probleme Maqedonisë, po ato
probleme janë iniciuar nga ana e Bullgarisë. Ndërsa, Maqedonia, nuk po gjen
zgjidhje për nënshtetësitë bullgare të cilat merren me lehtësi nga ana e qytetarëve
maqedonas dhe pretendimet territoriale të Bullgarisë që mund të ketë ndaj
Maqedonisë pas dhënies së një numri të konsiderueshëm nënshtetësisë.
Përndryshe gjendja politike, ekonomike dhe sociale në Maqedoni, për çdo dit
vetëm se po përkeqësohet. Greva gati një mujore e mjekëve, krijoi një konfuzion
dhe kaos të madh nëpër spitalet e Maqedonisë. Mjafton që të kishe pasur punë këto
ditë dhe do të vëreje në kurriz tëndin çdo
pakënaqësi të mjekëve ndaj ministrit Todorov. Personalisht kam mundur të bëjë
dallimin praktikisht para grevës dhe pas grevës të mjekëve. Njeriu mund të vdes
nga moskujdesi i mjekëve ndërsa ata të bartin prej njërit repart e në repartin
tjetër për një dokument të thjeshtë. Për një problem të caktuar janë dashur tre
ditë të harxhohen vajtje ardhje, lart e poshtë nëpër reparte për dokumente të
imta, të panevojshme që kanë mund të kryhen brenda pesë minutave nga ana e
autoriteteve mjekësore, ndërsa personi i sëmurë pas tre ditëve është marr në
shqyrtim.
Gjendja e mjerueshme nuk mbretëron vetëm në mjekësi, por edhe në sektorët
tjerë. Paramendoni Tetovën, një qytet të madh i cili vazhdimisht është në
rritje e sipër, me grevën e punëtorëve të higjienës. Po të mos binte borë këto
ditë, do të reflektonit të gjithë në fotografinë e kantave të bërllokut.
Paralajmërime për grevë të punëtorëve gjenden edhe në ndërmarrjen e
hekurudhave, ku disa punëtorëve me dhunë iu ndërrohet vendi i punës nga
profesioni që duhet të kryejnë, në punë nënçmuese dhe të pa pranueshme për
logjikën e njeriut.
Gjithë këto probleme po dalin në shesh si rezultat i menaxhimit të keq me
resurset e ndryshme në shtet nga ana e partisë VMRO-DPMNE. Investimet e
panevojshme në kuaj e përmendore janë një mur pa zë, i cili sa herë që hap zërin
për të qarë e vajtuar, i mbyllet goja me fasadë të re të stilit më të ri në
kicin dhe shundin në arkitekturë.
Ky shtet, ka marr pamjen e një nuseje të keqe, e cila duke e ditur situatën
aktuale në familjen e saj, se fëmijët nuk kanë të hanë bukë, ti blejnë mjetet
shkollore, veshje, etj, kërkon që të harxhoj para nga buxheti i familjes në
grimin e saj. Në shtëpi mungon vaji, mielli, sheqeri, ndërsa nusja vrapon pas
teshave me stil, duke mos bërë llogari fare për anëtarët tjerë të familjes.
Në këtë stinë të ftohtë të dimrit, veçse ka filluar gara e sjelljes së hënës
në tokë. Do të kemi rastin të dëgjojmë lloj-lloj fjalësh nga politikanët tanë të
pozitës e opozitës. E kam bërë këtë, e kam bërë atë. Ata të pozitës fajet do
t`ia lënë opozitës për të gjitha problemet ekonomike, sociale e politike në
vend, siç e akuzoi Sali Berisha, Edi Ramën në Shqipëri për mos marrjen e ftesës
së Shqipërisë për t`u futur në BE. Këta të opozitës nuk kanë të drejtë ta
ngritin zërin për të kundërshtuar e kritikuar pozitën, pasi që janë pajisur me
sindromën ‘ T`i i ke fajet’, siç e artikulojnë shumë bukur këtë fenomen kreatorët
e emisionit ’Ednooki’ në raportin Gruevski-Branko.
Pak para krishtlindjeve u zbulua edhe emri i ri për Maqedoninë. Shtefan
Fule, dha emrin më të përshtatshëm për zgjidhjen e problemit të emrit midis
Maqedonisë me Greqinë, duke e quajtur Maqedoninë thjeshtë Shkupi. Duhet t`ia përkujtojmë
Fule-s se ky emër nuk do të jetë i përshtatshëm për Republikën e Shqipërisë,
pasi që Republika e Shqipërisë e ka një tokë të saj me emrin Shkupi. Kështu që
ngadalë ngadalë do të dalim në pikën ku të gjithë bashkohemi kur jemi duke
fjetur dhe ëndërruar.
No comments:
Post a Comment