Hamdi Nuhiju
Sipas kalendarit të fisit Maja, dita e kiametit, ose shkatërrimit të botës është
me 21 dhjetor të vitit 2012. Ky lajm u përhap në të katër anët e botës me një
shpejtësi marramendëse.
Lajmi i ditës së kiametit si duket dëshirohet që të
shndërrohet në një produkt mjaft atraktiv në ekonominë e tregut. Këtë moment, këtë
ditë, e kanë pritur tregtarët anekënd botës për të shteruar xhepat e qytetarëve
të ndryshëm.
Në anën tjetër, humori i tepërt i medieve shqiptare dhe medieve të huaja me
qasjen e kalendarit të Majave, krijon një konfuzion tek besimtarët mysliman, të
cilët si shtyllë të besimit të tyre e kanë :’ Besimi në Ditën e Kiametit’. Shumë
shkollarë të mesëm, nëpër Shqipëri, Kosovë, Maqedoni e më gjerë në Ballkan, kur
të dëgjojnë mësimin për Ditën e Kiametit nga hoxhallarët e tyre, me siguri se
do të qeshen, zgërdhihen dhe nuk do t`i duket diçka e rëndësishme. Ndërsa filloristëve
si do t`i sqarohet besimi në ditën e kiametit, kur mediet kanë bombarduar kokën
e këtyre fëmijëve për njëzet e një dhjetorin, ditën e fundit të botës. Me siguri
këto fëmijë, baballarëve të tyre pas ca viteve do t`u thonë, a je duke folur për
kiametin që pat ndodh me njëzet e një dhjetor? A do të turpërohen hoxhallarët të
flasin për besimin në Ditën e Kiametit? A do t`u shtohen sprovat dhe pyetjet e panumërta
nga besimtarët kurioz e tekanjoz të cilët e mendojnë veten shumë stade më lartë
sesa hoxha?
Mendoj se ndjekja e verbër dhe me lehtësi e njerëzve tanë të çdo gjëje që
plasohet nëpër media është si rezultat edhe i mungesës së sinqeritetit të hoxhallarëve
që shpjegojnë parimet e besimit nëpër xhamitë tona.
Fatkeqësisht sot për ditën e kiametit, po flasin vetëm një grup i hoxhallarëve,
me qëllim frikësimin e xhematit e jo vetëdijesimin e të njëjtës për të vepruar
vepra të mira. Për ferrin, për ditën e kiametit, për djegien, për ndalesat, e
kanë shumë merak këto hoxhallarë të flasin. Ndërsa, për parajsën, për lejesat,
për shpërblimet në atë botë, për përgatitjen para ditës së kiametit , si duket
nuk janë të përgatitur të flasin.
Pjesa tjetër, dërmuese, e hoxhallarëve i japin hapësirë minimale, ose disa
madje as që e përmendin nëpër ligjëratat e tyre këtë gjë. Dhe kështu, besimi në
ditën e kiametit, në vend që të përdorët për t`u ndërgjegjësuar masat e myslimanëve,
ai përdoret për t`u frikësuar.
Ky raport indiferent ndaj kësaj dije që ka ardhur nëpërmjet Kur`anit dhe e
shpjeguar nëpërmjet Pejgamberit Muhammed alejhi selam, solli në pah këtë lajm
bombastik, si shumë lajme bombastike të këtij lloji që janë hedhur në treg
shpesh herë nga të huajt.
Bota perëndimore, analizon bukur psikologjinë e myslimanëve, e di kur duhet
tërhequr litarin dhe kur duhej liruar.
Hovi që mori lajmi në fjalë, dëshmon edhe njëherë mungesën e besimit te myslimanët
në Zotin, në Pejgamberin e tyre, në librat e shenjtë, po edhe në ditën e
fundit, ose të kiametit. Shumica e myslimanëve, lajmin bombastik të kalendarit
të Majave, po e interpretojnë si lajm i kot, sikur është e kot që të flitet për
këtë gjë.
Mungesa e besimit në Zotin, i bën këto njerëz ( shqiptarët mysliman) që të janë
popull i nënshtruar nga pakicat
maqedonase, nga pakicat laike me pikëpamje katoliko-centrike, nga pakicat e
komunitetit lgbt, nga pakicat serbe, etj.
Feja nuk e fton shqiptarin mysliman në gjumë, në papastërti, në pa punësi,
në padituri, në anarki, në vjedhje, në korrupsion, në tradhti, në kryeneçësi. Ajo
e mëson shqiptarin mysliman se si të jetoje në këtë botë, duke mos i penguar të
tjerët, por edhe duke punuar për vetveten, për popullin e tij dhe për ummetin në
përgjithësi.
Mendoj se kalendari i Majave, duhet që t`i ndërgjegjësoj hoxhallarët tanë
fillimisht për t`iu qasur problematikeve të besimit ma me seriozitet.
Besimi është çështje individuale e njeriut, por ajo është rrënja prej të cilës
dalin shumë degë. Degët nuk mund të janë individuale, por gjithmonë janë kolektive.
Nëse nuk kemi kujdes për besimin, do të kemi një kolektivitet të pakujdesshëm.
Besimi në Ditën e Kiametit është shtyllë e besimit mysliman, këtu nuk duhet
pasur asnjë lëkundje. Ai person që lëkund besimin e tij, si rezultat i propagandës
së medieve për kalendarin e Majave, duhet që të njëjtin ta ripërtërijë.
No comments:
Post a Comment