Hamdi Nuhiju
Sipas medieve shqiptare, serbe e maqedonase gjendja politike në Luginën e
Preshevës është e tensionuar. Kjo gjendje gjithmonë ka qenë e tillë. Por tashmë
është rritur pak pulsi i tensionimit me përafrimin e zgjidhjes së çështjes së
Kosovës.
Lugina e Preshevës si duket do të jetë kurban i Kosovës dhe i Serbisë. Faji
për këtë pozitë nuk është as tek Serbia e as tek Kosova, po te vet udhëheqësit
politik , po edhe të popullata e kësaj ane. Në vend që të krijohet uniteti
politik në Luginën e Preshevës, para zgjidhjes së statusit përfundimtar të
Republikës së Kosovës, Lugina e Preshevës gjendet më e përçarë se kurrë në
spektrin politik, nacional, ekonomik e fetar.
Artikulimi i unitetit politik do të sillte deri tek një zë i përbashkët i të
gjitha forcave politike në Luginën e Preshevës, dhe Lugina e Preshevës do të
ishte faktor loje për të tensionuar Serbinë, e jo kurban i dy palëve që
kuptohen shumë mirë dhe shumë lehtë. Nuk është hera e parë që shqiptarët në
gadishullin Ballkanik në tryezën politike ta humbin betejën me të tjerët, në këtë
rast me sllavët. Armët ishin zgjidhje e përkohshme dhe e padëshirueshme e palëve
për zgjidhjen e çështjeve nacionale e politike. Ndërsa tryeza e bisedimeve në
vetvete ngërthen edhe shumë lojtar të tjerë të cilët vrapojnë pas kulaçit
politikë.
Në stilin ‘Gangam style’, qeveria e Serbisë po nis luftë ndaj lapidarit të
luftëtarëve të lirisë të Luginës së Preshevës. Shkak merret lapidari, ndërsa
qëllimi është krejt diku tjetër. Serbët detyrimisht po i lidhin gjithë shqiptarët
e gadishullit Ballkanik pas një lapidari i cili me shumë lehtësi mund të rrënohet
nga qeveria e Serbisë. Shqiptarët duhet që të lidhen për ideale, objekte ose qëllime
që nuk ka mundësi dikush tjetër t`i rrënoj. Në Serbi ekzistojnë dy tendenca të kundërta
po që duhej funksionuar njëjtë. Lugina e Preshevës dhe Sanxhaku. Përderisa
boshnjakët e Sanxhakut i tregojnë Bosnjës dhe
Hercegovinës së në cilat pika duhet mbështetur të njëjtit duke i afruar
strategji dhe vizion veprimi politik, shqiptarët e Luginës së Preshevës, strategjinë
dhe vizionin politik për mbështetje nga Prishtina ia lënë në dorë Dacicit që në
stilin ‘ Gangam style’ tua caktoj.
Përderisa udhëheqësit e Sanxhakut kanë hyrë në jetën politike të Serbisë
edhe si faktor stabiliteti edhe si faktor jo stabiliteti duke sjell sytë e botës
Lindore kah çështja tyre, udhëheqësit politik të Luginës së Preshevës si duket
në këtë lojë janë futur thjeshtë si përfitues xhepi të përkohshëm. As boshnjakët
e Sanxhakut nuk janë për t`u marr shumë lakmi. Por, sa herë që të duan, ata e turbullojnë
skenën politike serbe, duke mos pasur nevojë të derdhet gjaku i askujt. Boshnjakët
e Sanxhakut, si duket e kanë kuptuar se nuk do të kanë mundësi që të mbrohen
nga ana e shtetit të tyre amë. Për këtë arsye edhe të gjitha punët e tyre i kanë
marr mbi vete. Çdo cep i botës e ka kuptuar për kërkesën e boshnjakëve të
Sanxhakut për autonominë e saj. Njerëzit e shohin me admirim edhe Akademinë
Boshnjake të Shkencave të themeluar në Novi Pazar. Ideja e tyre po sjell fryte
në çdo sferë të jetës shoqërore në Serbi. Si rezultat i këtij projeksioni
politik, shtete të fuqishme si Turqia janë të interesuara sinqerisht për
zgjidhjen e problemeve të boshnjakëve të Sanxhakut, po edhe për investime
serioze në atë territor që do të hapte vende të reja të punës.
Shqiptarët e Luginës së Preshevës, të përçarë si çdoherë, po presin çdo
rrjedh të bisedimeve midis Kosovës me Serbinë. Ata nuk po bëhen faktor politikë
e cila do të mund t`i ndihmonte Kosovën në bërjen presion ndaj Serbisë, po si të
hutuar po presin fjalët e atyre politikanëve.
Të njëjtët politikan duke mos pasur vizion politik për zgjidhjen ekonomike
të kërkesave të shqiptarëve të Luginës së Preshevës, luajnë me sferën nacionale
duke ndezur eufori tek to dhe duke harruar problemet reale që ekzistojnë. Mendoj
se mjeshtërisht pala serbe po ia hip çmimin veriut të Kosovës, duke e hedhur në
erë Luginën e Preshevës.
Videot komike me ‘AKSH’ dhe deklaratat boshe të disa politikanëve
provincial nuk zgjidhin as çështjen e veriut të Kosovës, po as nuk i ndihmojnë proceseve
politike në Luginën e Preshevës.
Këto ditë patëm rastin ta dëgjojmë edhe deklaratën e funksionarit të lartë
politik amerikan në Ballkan, Filip Riker, i cili thirrej në ligjet e Serbisë për
problemet që ekzistojnë rreth lapidarit. D.m.th qysh në deklaratën e parë,
SHBA-të janë bërë palë me serbët dhe shqiptarët e Luginës së Preshevës lehtësisht
mund të dëmtohen nga kjo situatë. Mendoj se është koha që shqiptarët e Luginës
së Preshevës të mos mendojnë as në Kosovën as në Shqipërinë, po punët t`i
marrin vet në duar. Në këtë mënyrë do ti shërbenin shumë kauzës kombëtare, po
edhe më lehtë do t`i zgjidhnin problemet e tyre ekzistenciale.
No comments:
Post a Comment