Hamdi Nuhiju
Ngjarjet e fundit në skenën politike
të Maqedonisë po trishtojnë jo vetëm Evropën, po edhe opinionin e brendshëm. Arrestimi
i gazetarit Kezharovski për shkak të teksteve të tij dhe nxjerrjes në pah të
identitetit të dëshmitarit të mbrojtur, që sipas gjitha gjasave nuk ishte dëshmitar
i mbrojtur, tregojnë aftësinë për vet ngulfatej të qeverisjes së Nikolla
Gruevskit.
Tentimi për të mbyllur zërin e
gazetarëve dhe ngulfatur sistemin e drejtësisë, po kthehet si një çorbë e pa
zier mirë.
Çdo shtrëngim që i bëhet gazetarëve,
lirisë së shprehjes, medieve, po i kthehet mbrapsht vet hyqymetit. Jam i bindur
se i njëjti ka shpresuar se përfundimisht do të mbyll zërat opozitar dhe nuk do
të jap hapësirë për të treguar realitetin politik që po realizohet në vend.
Përkundër mbylljes dhe ri hapjes
së të përditshmes Zhurnal Plus, si bumerang doli në treg edhe gazeta e Branko
Gerovskit babait të medieve maqedonase në vend. Çmimi i gazetës në fjalë ‘
Gazeta e lirë’ ishte qesharak, ose çmim që veç Brankoja di të vendos. Edhe për
hovin e gazetës Fokus, u deshtë që të ndodhe një fatkeqësi për t`u rehatuar
hyqymeti.
Historia midis hyqymetit dhe ngufatjes
së lirisë së shprehjes dhe lirisë së ekzistencës është histori e moçme. Ajo as
nuk ka nisur me këtë qeveri, e as që do të përfundoj me të. E njëjta do të
vazhdoj edhe me qeveritë tjera, po vetëm në rrethana dhe kushte tjera.
Ndoshta vet Justiniani i I do ta
kishte zili kryeministrin tonë për largpamësinë e tij. Edhe pse për disa
Justiniani i I, burri i mbretëreshës Teodora është një hero dhe vizionar, për
historianin Prokopij Kesariski ishte thjesht një diktator i cili vilte e milte popullatën
e tij në mënyra të ndryshme. Në librin e tij “ Historia e fshehtë” Kesariski përshkruan
në detaje për të gjitha format e vjedhjes së Justinianit dhe Teodorës. Aty përshkruhen
edhe investimet e pakuptimta të mbretit bizantin në disa ndërtime sa për të shpërlarë
paratë. Është me interes të dihet se në libër përmendet edhe një grua ‘publike’
e quajtur Maqedonia e cila ka pasur ndikim të madh tek vet mbreti bizantin.
Qytetet u zbrazën nga pamundësia për
të paguar taksat dhe tatimet që Justiniani kishte vendosur për to. Në qytetet e
sapo pushtuara, vendasit kishin të drejtë që ti ikin tatimeve vetëm për një
vit. Pas një viti ata detyroheshin që të lenin shtëpitë e tyre dhe të iknin në
vende tjera.
Edhe funksionarët e lartë shtetëror
të eshalonëve të ndryshme u larguan nga privilegjet e ndryshme dhe nëse arrinin
në ndonjë pasuri të caktuar, ata do të detyroheshin që atë t`ia jepnin vet
mbretit Justinian.
Historia e Justinianit dhe Teodorës
është me interes që të lexohet dhe studiohet edhe sot e kësaj dite. Përmes asaj
historie mund të reflektojmë mbi shumë ngjarje aktuale që po ndodhin tek ne, në
Ballkan, në Evropë po edhe në botë. Ajo po përsëritet, po vetëm me emra dhe
aktor tjerë.
Ndaj dënimit me burg prej 4.5
viteve të gazetarit Tomisllav Kezharovski reagoi edhe Federata Evropiane e
Gazetarëve. Kryeministri ynë përmes këtij hapi po ndot imazhin e Maqedonisë jashtë
dhe brenda vendit. Ndoshta në momentin e kalimit të vijës së kuqe do të
detyrohet që të marr hapin e kolegut të tij bullgar Bojko Borisov i cili u
detyrua që të jap dorëheqje nga posti i kryeministrit për shkak të protestave kundër
rritjes së shpenzimeve të energjisë elektrike.
Me largimin e Bojko Borisovit
prej kryeministrisë së Bullgarisë, rryma elektrike nuk është ulur, por
popullata është e qetë. Ajo dënoi moralisht një ish kryeministër i cili jepte
imazhin negativ të vendit të tij.
Nuk është e rastësishme thënia ‘
një sabër sa një mijë selamete’. Populli jonë dhe popujt tjerë në Maqedoni dinë
të bëjnë shumë sabër. Po ende nuk kanë arritur deri tek niveli i parë i sabrit
për t`i parë një mijë selametet.
No comments:
Post a Comment