Hamdi Nuhiju
Me 25 dhe 26 tetor 2013, në
restorantin Grand Remi Komerc në Kumanovë u mbajtën garat e para ballkanike në
hifz të Kur`anit. Këto gara janë të një rëndësie të veçantë për arsyen e
mbajtjes së evenimenteve të këtilla shumë rrallë, po ashtu edhe për shkak të rëndësisë
së rritjes së vlerës së qytetit të Kumanovës, në këtë sferë, në Ballkan.
Pjesëmarrës në gara ishin nga tërë
Ballkani: Bullgaria, Serbia, Bosnja, Kosova, Maqedonia, Mali i Zi, Turqia.
Publiku ishte jashtëzakonisht i kënaqur.
Pjesëmarrësit dhe pjesëmarrëset në
këto gara edhe pse me nacionalitete të ndryshme, me kultura të ndryshme, me
tradita e doke të ndryshme nga njëri-tjetri, të gjithë kënaqnin publikun në mënyrë
të njëjtë. Gjuha që ato prezantuan ishte gjuhë universale. Theksi që treguan
gjatë shqiptimit të atyre harfeve ishte theks i njohur si për më të riun ashtu
edhe për më të moshuarin.
Larmia e pjesëmarrësve për nga
mosha, kultura e veshjes, sjellja e interpretimi, e bënë këtë eveniment ende më
të begatë. Terri informativ, ishte e vetmja rrugë arsyeshëm e pa arsyeshme.
Pjesëmarrës me gjuhë dhe
nacionalitete të ndryshme, garonin në gjuhën universale, atë të Kur`anit
famëmadh. Ishte një ndjenjë e jashtëzakontë të jesh në mesin e mbi 30 kur`anave
të gjallë si garues e pjesëmarrës. Të gjithë kishin mësuar fjalën e Zotit
përmendsh dhe ishin zotuar se do ta ruajnë në memorien e tyre deri në përfundim
të jetës.
Kjo ngjarje shoqërore e cila
ndodhi këto ditë në Kumanovë, është një dritë në mesin e kësaj errësirë që ka
kapluar shoqërinë shqiptare të Maqedonisë. Popullata e lodhur nga hallet,
brengat e përditshme, më në fund u drejtua që ta kënaq shpirtin. Ky shpirt
duhet që të jetoj i lirë dhe i kënaqur, e nuk guxon që të ngulfatet nga tymi i
epshit dhe lajkat e politikës.
Në të kaluarën shqiptarët jetonin
ndoshta në robëri politike, ndoshta edhe në pamundësi financiare më të madhe
sesa sot, po ishin të gjallë shpirtërisht dhe të dashur njëri me tjetrin. Ata
jetonin të lumtur, pasi që njihnin Zotin e tyre dhe praktikonin rregullat
fetare. Shumë studime prej instituteve të ndryshme me renome ndërkombëtare edhe
sot e kësaj dite tregojnë qartas se njerëzit më të lumtur në botë janë fetarët.
Ngjarjet e këtilla kur`anore janë
element i shpresës dhe vizion i të ardhmes së popullatës shqiptare në Kumanovë,
po edhe asaj myslimane në Maqedoni në tërësi.
Në qendër të këtyre garave
kur`anore ishte fituesi i tyre hafiz Ahmet Sarikaya, të cilit Zoti ia kishte
marr të pamurit, po i kishte dhënë shpirt. Një djalosh pa sy, i cili mëson tërë
Kur`anin përmendsh dhe atë ia mëson të tjerëve, nuk mund të jetë tjetër pos dëshmi
e begatisë së Zotit dhënë popullit të tij.
Ilahitë, recitimet kur`anore,
fjalimet, mirënjohjet, dreka e darka ishin pjesë përbërëse e këtij evenimenti.
Dikur në Novi Pazar Kumanova ka dërguar
hafizen e parë të Kur`anit, shqiptare, ndërsa tash nga Novi Pazari, erdhën shtatë
hafiz të Kur`anit të përgatitur për garat ballkanike. Prej tyre kishte disa që
fituan vende në kategori të ndryshme të garave.
Rruga që ndjekin njerëzit e mëdhenj
nuk është e lehtë. Garuesi nga Kosova i cili në Libi kishte fituar një vend të posaçëm,
në garat ballkanike arriti që të marr vetëm vendin e dytë në njërën prej
kategorive.
Garuesit tjerë të cilët në garat
evropiane në hifz të Kur`anit që organizohen në Zagreb të Kroacisë kanë marr
vende të ndryshme, në Kumanovë, në garat e para ballkanike të Kur`anit disa
prej tyre nuk patën fat.
Juria profesionale në krye me
hfz. Bajram efendi Ajetin nga Kumanova, Sulejman Okumush nga Turqia dhe Fadil
Bektash nga Bosnja e Hercegovina ia ngritën peshën garuesve po edhe garave në përgjithësi.
Kumanova ngeli pa frymë ose me
frymën e ajeteve kur`anore këto dy ditë. Dy ditë dritë zemre dhe terr
informativ. Për të thyer këtë terr informativ, mora lapsin të shfrytëzoj mundësinë
time.
No comments:
Post a Comment