Hamdi Nuhiju
Ministria e arsimit dhe shkencës e Republikës së
Maqedonisë paramendoi një mori reformash të cilat sipas arsyetimit të tyre, do
të ndikojnë në cilësinë e arsimit të lartë, në cilësinë e pedagogëve, si dhe në
cilësinë e nxënësve drejtë orientimit të tyre profesional.
Këto reforma gjithëpërfshirëse i kapin ose i prekin të
gjitha shtresat e arsimit. Ajo që më së shumti ra në sy, ishte reforma arsimore
në sistemin e lartë, ku prej studentëve kërkohet dhënia e një provimi shtetëror.
Reagimet e qarqeve akademike opozitare, si dhe të studentëve
ishin kundër këtyre reformave, sidomos këto të fundit e shprehën revoltin e
tyre përmes marsheve studentore. Ajo që ra në sy ishte reagimi i krerëve të
ministrisë së arsimit, se as ata ende nuk e kanë të qartë se si do të duket
provimi shtetëror, por pas një përpunimi të shpejtë, ekspres, do ta kuptojnë dhe
do t`ia paraqesin opinionit.
Tashmë i kemi të qarta dënimet që kanë të bëjnë me mosdhënien
e provimit shtetëror për student, i cili tri herët e para sipas këtyre propozimeve
është pa pagesë, herën e katërt njëqind denar, të pestën 3000, të gjashtën
6000, të shtatën 12.000 den dhe pas të shtatës do të vazhdohet me këtë shumë.
Vendosja e provimit shtetëror është një lloj përbuzje e
institucioneve të larta akademike, duke mos njohur aftësinë e tyre për të
nxjerr kuadro.
Përmendja e dënimeve për mos dhënien e këtij provimi,
sikur tregon dhëmbin e prishur të Qeverisë së Republikës së Maqedonisë.
Edhe pse kemi respekt maksimal për punën e ministrit të
arsimit, ne nuk mendojmë se këto reforma kanë rrjedh prej tij.
Arsyetimi se provimi shtetëror për student realizohet
edhe në disa vende të Unionit Evropian, është një arsyetim i kuptueshëm në këtë
situatë të ngritjes së pluhurit politik. Fatkeqësisht as studentët, as qarqet
akademike, po kam bindjen se as pushtetarët nuk e kanë ende të qartë propozimin
për provimin shtetëror, realizimin e tij, si dhe format e menaxhimit me situatën
nëse ai provim shtetëror nuk jepet.
Tjetër propozim ishte është themelimi i një Akademie për mësues
ose edukator, i cili do të përkujdeset që këto mësues, edukator, profesor, do të
ishin më profesionist në punën e tyre. Kjo Akademi nuk ka arsyetime juridike, përderisa
ekzistojnë institucione të larta tjera akademike që po e kryejnë punën e saj. Nëse
dyshohet në punën e këtyre institucioneve, atëherë ato institucione duhet të pavarësohen,
duke u forcuar me kuadro të fuqishme, e jo të shkohet drejt centralizimit të tërësishëm.
Doktorantët e ardhshëm nuk do të kishin mundësi që të doktorojnë
jashtë pesë universiteteve renditura si më të mirat, sipas kritereve të
Shangait. Kjo gjë është e mirë, pasi që nxitë kuadro më profesional, dhe e ulë
prodhimin e doktorëve, të cilët nuk i plotësojnë edhe kriteret elementare. Por, edhe këtu vihet një pikëpyetje e madhe në
implementimin e kësaj reforme.
Sa do të janë të sigurt shqiptarët e Republikës së
Maqedonisë se nuk do të përdoren standarde të dyfishta ndaj tyre tek rasti i doktorantëve?
Sa do të janë të sigurt shqiptarët e Republikës së
Maqedonisë se Akademia e mësuesve ose edukatorëve nuk do të përdor standarde të
dyfishta ndaj mësuesve, profesorëve e arsimtarëve shqiptarë?
Mendoj se para se të organizohet një debat publik rreth
reformave në arsim në nivel gjithëpërfshirës, ky debat duhet të jetë brenda
shqiptar.
No comments:
Post a Comment