Hamdi Nuhiju
Data e mbajtjes së zgjedhjeve lokale është caktuar me 15 tetor të vitit
2017. Partitë politike në mënyrë intensive po punojnë në terren për të tërhequr
sa më shumë votues dhe për t`i fituar komunat ku ato janë duke aderuar.
Qëllimi i subjekteve politike s
hqiptare dhe maqedonase është që të ruajnë pozicionet
e tyre të pushtetit lokal, por edhe të zgjerojnë nga pushteti i tyre duke
ndryshuar struktura udhëheqëse aktuale.
Janë bërë matematika të ndryshme për këto zgjedhje lokale qysh nga zgjedhja
e kandidatëve që do të garojnë edhe deri te programet politike të cilat po i
afrohen popullit. Nëse i pyet njerëzit në rrugë se çfarë programi për këto
zgjedhje lokale të ka afruar një parti shqiptare, jam i bindur se nuk dinë të
japin përgjigje.
Ajo që le me gishta në gojë subjektet politike shqiptare është gara e
habitshme e kandidatëve të LSDM-së për kryetar të Komunës së Kumanovës. Zoran
Damjanovski dhe Martin Dimitrievski dy kandidatët e mundshëm që janë duke
garuar brenda partisë së tyre fillimisht kanë paraqitur programet e tyre për të
tërhequr anëtarësinë e tyre, pastaj bëhet zgjedhja e tyre dhe në fund dalin në
mejdan ose garë për të fituar Komunën e Kumanovës.
Menjëherë pas leximit të këtij rasti më ka shkuar ndërmend të pyes se cili
subjekt politik shqiptar për ndonjë komunë shqiptare ka vepruar kështu? A di
opinioni për garën e brendshme partiake për shembull në subjektet e reja
politike shqiptare si Aleanca për Shqiptarët dhe Lëvizja Besa, se për subjektet
e vjetra politike si BDI dhe PDSH po kuptohet se ka perënduar koha e tyre?
Nëse edhe Lëvizja Besa edhe Aleanca për Shqiptarët veprojnë njëjtë si BDI
dhe PDSH-ja në përzgjedhjen e kandidatëve, demokracisë së brendshme, tregtisë
prapa syve të opinionit, atëherë cili do të ishte qëllimi i ekzistimit të tyre?
Apo ndoshta t`i zëvendësojmë disa të këqij me të këqij tjerë? Po ndryshimi që janë
duke e pritur shqiptarët kur do të ndodh?
Veprimtaria politike në këto zgjedhje lokale e të gjitha subjekteve
politike shqiptare pa asnjë përjashtim po më jep përgjigjet e pyetjeve të
panjohura deri më tani për mua se pse shqiptarët vendosën që të votojnë për një
opsion maqedonas.
Unë tashmë e di programin politik të LSDM-së dhe kandidatët e saj për Komunën
e Kumanovës, e di edhe programin politik të VMRO-DPMNE-së dhe subjekteve tjera
politike maqedonase. Por nuk di gjë për programet politike të subjekteve
politike shqiptare për këshilltarët e mundshëm që mund të nxjerrin në Kumanovë
po edhe për Komunën e Likovës dhe komunat tjera shqiptare në Maqedoni.
Unë nuk di asgjë se çka ka punuar deri më tani kryetari i komunës së Kërçovës
dhe cila është arsyeja ( përveç që është shqiptar) që ta mbështes atë në
zgjedhjet lokale? Të qenurit të tij shqiptar nuk zgjidh problemet e
hallexhinjve të shumtë të Komunës së Kërçovës. Duhet pasur interesim dhe vizion
për të zgjidhur hallet e qytetarëve.
Për shembull, në Komunën e Strugës, lideri i LR PDSH-së, Ziadin Sela,
kandidat i dikurshëm i PDSH-së nuk ka treguar asnjë rezultat konkret dhe të
prekshëm për banorët e Strugës. Përveç ankesave që kam dëgjuar për të, nuk kam
parë ndonjë rezultat të prekshëm për qytetarët e Strugës. Po tash me cilin parim ka vendosur që të
kandidoje për Strugën, vetëm për atë se është shqiptar dhe se Komuna e Strugës
nuk duhet që të shkoje në duart e maqedonasve? Nëse është kjo logjika dhe
parimi i veprimtarisë politike të subjekteve politike shqiptare, atëherë ne me
të vërtet qenkemi një popull i prapambetur dhe pa kulturë politike.
Problemet e shqiptarëve në Maqedoni janë të prekshme, edhe zgjidhjet për
ato probleme duhet që të janë të prekshme. Në Vizbeg të Shkupit shqiptarëve të
atij fshati i duhet shkollë ku fëmijët e tyre do t`i çojnë të mësojnë se si
duhet shqiptaria. Atyre nuk i duhet mentaliteti i kot dhe prapambetur politik
nacionalist. Banorët e Vizbegut janë shqiptar dhe do të janë edhe shqiptar më të
mirë nëse ndonjë subjekt politik shqiptar i premton dhe i ndërton një shkollë
fillore, ia rregullon rrugën, kanalizimin e ujësjellësin.
No comments:
Post a Comment