Hamdi Nuhiju
Sot në mediet e Maqedonisë së Veriut lajm i ditës që tronditi opinionin e këtushëm
ishte ai i drejtoreshës së Klinikës së Dermatologjisë, Nina Caca Biljanovska, e
cila gjatë qëndrimit të saj në Itali është infektuar me Korona Virus.
Pas kthimit
të saj nga Italia, Nina Caca Biljanovska është kthyer në vendin e punës si
drejtoresh dhe si mjeke në misionin e saj për të shëruar njerëz. Ajo është
paraqitur si një rrezik potencial i tyre. Mediet raportuan paraprakisht për këtë
skandal, ndërsa sot zyrtarisht reagoi edhe ministri i shëndetësisë,Venko
Filipce i cili deklaroi se Biljanovska do të suspendohet nga puna.
Ky qëndrim i ministrit Venko Filipce sa duket i drejt në vetvete është i
padrejtë edhe për arsyen e thjeshtë se si mundet që një veprim i këtillë
skandaloz të përmbyllet dhe rrumbullakohet vetëm me një suspendim nga puna? Drejtoresha
në fjalë, duke i pasur parasysh të gjitha implikimet dhe pasojat e sëmundjes përveç
suspendimit nga puna, duhej që t`i bëhej një ndalesë për tërë jetën për ushtrim
të profesionit të mjekut si dhe dënim me burg për shkak të c`rrënjosjes së
besimit në sistemin shëndetësor në Maqedoni dhe rrënimin e sistemit të vlerave
që demokracia në Maqedoni nga viti 1991 ndërtohet dhe funksionon mbi to.
Por skandali me mos funksionimin ose përdhosjen e vlerave demokratike në
Maqedoni është bërë ende më i thellë dhe më i dukshëm edhe në sistemin arsimor.
Para disa ditësh, dy shkollave në Çair të Shkupit iu ndërruan dy emra, lajm që
u pasua me pompozitet të madh nga mediet dhe BDI-ja. Por në opinion dolën disa
fotografi nga shkollat shqipe në Çair ku pushteti i BDI-së nuk ka vënë as dorën
as këmbën. Ndoshta ka vënë dorë vetëm në rrënimin e vlerave duke ndërhyrë në
sistemin arsimor në momentin e zgjedhjeve, duke i detyruar punëtorët arsimor të
marrin pjesë në tubime partiake.
E kundërta e Korona Virusit është pastërtia, ndërsa në shkollat në Çair të
cilat u panë përmes fotografive të postuara në rrjetet sociale u pa haptas se
aty as kafshët nuk do të kishin mundësi të ndiqnin mësimet e të mos flasim për
fëmijët shqiptar. Jo më larg se para një viti në Shkup u promovua një shkollë
fillore ku janë shpenzuar miliona euro, ndërsa aty mësojnë vetëm nxënësit
maqedonas. Ndërsa me ministrinë e arsimit me dekada udhëheqin kuadro të paafta
të BDI-së të cilët të vetmin kontribut që kanë bërë në sistemin arsimor në
Maqedoninë e Veriut ka qenë ai i partizimit të skajshëm dhe rrënjosjes të
sistemit të meritokracisë.
Medreseja është institucion arsimor ende i pa akredituar ku një numri të
madh të kuadrove i merret e drejta që të trajtohen në mënyrë të barabartë nga ligji dhe institucionet e shtetit. Përveç
kësaj, kuadrot e BDI-së që kanë udhëhequr me ministrinë e arsimit kanë
kontribuar mjaftueshëm edhe në diskriminimin dhe përjashtimin e vajzave me
shami nga shkolla, si dhe mësimin në gjuhën maqedonase të nxënësve shqiptar në
Prilep dhe Veles. Për këtë gjë, Ali Ahmeti dhe BDI as që mërziten, e sidomos
nuk mërzitet ministri i arsimit, Arbër Ademi i cili ka përshëndetur aktivistët
e BDI-së me këngën e Dafina Zeqirit-Hajde ma knej.
Para disa ditësh u publikua lajmi se në shkollat e Tetovës me rrethinë mungojnë
sapunë për larjen e duarve. Në këtë mënyrë, ministri i arsimit, Arbër Ademi,
duke e pasur parasysh Korona Virusin, po vë në rrezik jetën e nxënësve shqiptar
të Tetovës, ndërsa ai ka kohë të mos mërzitet dhe të argëtohet nën tingujt e këngës
së Dafina Zeqirit.
Në gjithë këtë zallamahi,e vetmja shpresë për qytetarët e Maqedonisë së
Veriut, e sidomos për shqiptarët është ardhja e 12 prillit dhe mundësia për të ndëshkuar
politika të gabuara nga politikanët shqiptarë. Ata e kanë në dorë fatin e tyre
për të vendosur nëse duan shkolla që do t`i mungojnë sapun në momente të
epidemive, apo do të përcaktohen për ndërtimin e shkollave njëjtë si në
ambientet ku jetojnë maqedonasit, po ashtu edhe shqiptarët.
No comments:
Post a Comment