Hamdi Nuhiju
Sloganet e partive politike gjatë zgjedhjeve lokale, parlamentare dhe
presidenciale japin porosinë dhe mesazhin deri te anëtarët, votuesit dhe
simpatizantët për projektin dhe idenë për të cilën janë duke garuar. Slogani në
parim duhet të jetë i thjeshtë, të mbahet mend lehtë nga të gjithë dhe të
reflektoj dimensionin elektrizues tek subjektet politike.
Zgjedhjet e parakohshme parlamentare që do të mbahen me 12 prill të vitit
2020 në Maqedoninë e Veriut na kanë habitur me disa gjetje sloganesh të disa
subjekteve politike shqiptare. Gjetja më interesante dhe që ia vlen të
reflektohet në të është ajo e Bashkimit Demokratik për Integrim-Hajde knej. ‘Vjen
vera ka dera’ është slogani i PDSH-së së Menduh Thacit.
BDI dhe PDSH si dy subjektet më të vjetra politike shqiptare në Maqedoninë
e Veriut po garojnë për të kërkuar votën e shqiptarëve dhe vazhduar politikat e
njëjta sic i kanë realizuar me dekada.
Vera në dyert e PDSH-së do të jetë e vështirë që të vijë, duke e pasur
parasysh mënyrën e udhëheqjes së kampanjës politike ku të gjithë liderët
politik shqiptar janë të këqij me përjashtim të Menduh Thacit dhe Ali Ahmetit. Menduh
Thaci si një top dore e BDI-së po përdoret në këtë kampanjë zgjedhore njëjtë
sic u përdor Shpend Ahmeti dhe PSD-ja në Kosovë nga ana e AAK-së.
Slogani Hajde knej, sic duket është gjetje e inspiruar nga kënga e Dafina
Zeqirit-Hajde ma knej, këngë me përmbajtje dhe skena erotike. Për këtë gjë na
tregoi edhe i pari i institucioneve edukative-arsimore,ministri i arsimit dhe shkencës,
Arbër Ademi i cili gjatë fundjavës, aktivistëve të BDI-së i dëshiroi një
fundjavë të këndshme me këtë këngë.
Në opinion slogani i BDI-së u interpretua ndryshe nga ajo që aktivistët e
BDI-së duan të na paraqesin. U tha se BDI-ja është më e dobët se 10 deputetët
aktual, prandaj ka nevojë që votuesit t`i thirr knej.
Hajde knej është një porosi dhe mesazh se BDI-ja ka krizë të identitetit
politik të cilin e ka dëmtuar gjatë dy dekadave të fundit përmes skandaleve të
shumta. Votuesit e dikurshëm dhe ish simpatizantët e BDI-së tashmë janë ose
neutral, që nuk merren me asnjë parti politike shqiptare, ose kanë kaluar tek
opsionet tjera shqiptare jashtë BDI-së dhe PDSH-së. Këtë gjë shumë bukur e ka
pasqyruar edhe lideri i BDI-së, Ali Ahmeti në një intervistë televizive ku tha
se BDI-ja është Nëna e madhe.
Pas presionit të opinionit publik, ministri i arsimit dhe shkencës, Arbër
Ademi e fshiu postimin e tij në Facebook me këngën e Dafina Zeqirit-Hajde ma
knej.
Pas veprimit pendues të ministrit Ademi, a do të pendohet edhe BDI-ja për këtë
gjetje që tregon qindra-mijëra dobësi? Në komentet që u bënë në postimin e
ministrit Ademi, nga ana e aktivistëve të BDI-së i jepej kurajo të njëjtit si
një njeri mendjehapur. Në opinionin publik parashtrohet pyetja, sa e carë duhet
të jetë mendja për të përzgjedhur një slogan që haptas tregon frikën e BDI-së
prej oponentëve politik?
No comments:
Post a Comment