Hamdi Nuhiju
Nina Caca Biljanovska, turpi i mjekësisë maqedonase, e shkarkuar nga puna
dje është kthyer në punë.
“ Mjekja Nina Caca Biljanovska e cila u shkarkua nga pozita drejtoreshë e
Klinikës Shtetërore për sëmundje të lëkurës, për shkak se në fillim të
pandemisë nuk kishte treguar se është kthyer nga Italia dhe ka shkuar në vendin
e punës duke mos u vetizoluar, dhe ndërkohë kishte infektuar 6 kolegë, tani
është kthyer në vendin e saj të punës.
Drejtoresha Biljanovska madje mori padi penale nga policia, ndërsa
Prokuroria Publike propozoi që e njëjta të dënohet me gjobë prej 10 mijë
eurove. Dhoma e mjekëve pret aktvendim të plotfuqishëm me çka do të vendosë
nëse do i merret licenca për punë, por ndërkohë mjekja është kthyer në punë.
Caca Biljanovska ishte pacientja e katërt me radhë e infektuar me korona
virus në Maqedoni. Pasi u vërtetua se është pozitive ndaj Covid, e gjithë
klinika u mbyll, ndërsa kolegët e saj u vendosën në izolim. Kjo sjellje e
mjekes u dënua nga ministri i shëndetësisë dhe gjithë kolegët nga fella
mjekësore. “, raportuan dje mediet elektronike dhe të shkruara.
Në kulmin e kampanjës zgjedhore kur partitë politike po merren me njëra-tjetrën,
diqysh si para syve dhe në heshtje të opinionit, Nina Caca Biljanovska duke mos
respektuar etikën e mjekëve dhe pacientëve rikthehet në vendin e saj të punës.
Në kulmin e shifrave të infektuarve me COVID 19, sidomos në rajonin e
Shkupit, mjekja e cila ishte shkaktare për shpërndarjen e kësaj sëmundjeje shpërblehet
me rikthim në vendin e punës. Edhe pse sipas medieve, proceset kundër saj janë të
hapura, është e habitshme se ku u gjet ajo birucë në rregullore dhe ligj që ia lehtëson
asaj rikthimin në punë.
Kryetari i LSDM-së, Zoran Zaev dhe ai i VMRO-DPMNE-së, Hristijan Mickovski
në vend që të merren me vendime të këtilla skandaloze që duhet të shqetësojnë
secilin qytetar të Maqedonisë së Veriut, ata para syve të opinionit, në debat
publik, ndajnë pazare për të krijuar qeverinë e re pa shqiptarët.
Pas këtij vendimi skandaloz për rikthim në punë të mjekes në fjalë, cili do
të jetë besimi i qytetarëve ndaj institucioneve të shtetit dhe sidomos ndaj
atyre shëndetësore. Nëse pas zgjedhjeve, cila do qeveri do të ndërmerrte masa për
rikthimin e orës policore në luftën kundër pandemisë, sa do të ishin kredibile
ato masa?
Pse duhet t`i respektojmë masat kundër pandemisë dhe të mos rebelohemi si
qytetarët serb që u rebeluan kundër vendimeve politike të qeverisë së re?
Me Caca Biljanovska në institucionet shëndetësore dhe vrasësin e Almirit nëpër
rrugët e Kumanovës, do ta ketë bukur të vështirë qeveria e re që të ndërmarr çfarë
do hapi drejt rikthimit të orës policore.
Qytetarët kanë nevojë që t`i besojnë institucioneve shëndetësore dhe jo ta
humbasin edhe atë pak besim që i ka ngelur. Në këtë mënyrë, sistemi që u bë
kujdestar i padrejtësive të shumta po nxit shtimin e mosbesimit të qytetarëve në
institucionet shëndetësore dhe si pasojë vjen deri te shpërngulja e tyre.
Rikthimi i Caca Biljanovskas në vendin e punës do të duhej të ishte njëra prej
arsyeve se pse shumë njerëz marrin vendimin për ta lëshuar vendin përgjithmonë.
No comments:
Post a Comment